ছাগলীয়াৰ বন বিষয়া দীপক চক্ৰৱৰ্তী নিলম্বিত, ধুবুৰীৰ ডিএছপি গ্ৰেপ্তাৰৰ পিছতে তৎপৰ বন বিভাগ 

ৰাজ্য জোকাৰি যোৱা ধুবুৰীৰ শিল ছিণ্ডিগেটত সাঙোৰ খাই পৰা ডিএছপি গ্ৰেপ্তাৰৰ পিছত বন বিভাগৰ নিজস্ব তদন্তত নিলম্বিত হ'ল ছাগলীয়াৰ বন বিষয়া দীপক চক্ৰৱৰ্তী ৷ ২৮ মে'ত ছাগলীয়াৰ পৰা ধুবুৰী আৰক্ষীয়ে  ১২২খন শিলভৰ্তি ট্ৰাক জব্দ কৰাৰ পিছত পোহৰলৈ আহিল সীমান্তৰ  শিলৰ ছিণ্ডিকেট কাহিনী ৷

অসম বংগ  সীমান্তৰ পৰা সোণাহাট আন্তঃৰাষ্ট্ৰীয় সীমান্তলৈ চলি থকা শিলৰ ছিণ্ডিকেটৰ সৈতে  গ্ৰেপ্তাৰ হোৱা ডিএছপি যতীন দাসৰ আছিল পুৰণি সম্পৰ্ক ৷ আৰক্ষী বিষয়াজনৰ গ্ৰেপ্তাৰৰ পিছতে তোলপাৰ লাগে ৰাজ্যত ৷ ইয়াৰ পিছতে বন বিভাগে আৰম্ভ কৰিলে নিজাববীয়া তদন্ত ৷ বন বিভাগে প্ৰাথমিক  তদন্তত তাৎক্ষণিকভাৱে  নিলম্বন কৰিলে ছাগলীয়া বন বিভাগৰ বিষয়া  দীপক চক্ৰৱৰ্তীক ৷

অভিযোগ অনুসৰি, সীমান্তৰ শিল ছিণ্ডিকেটত বিশেষভাৱে  ইন্ধন যোগাইছিল বন বিষয়া চক্ৰৱৰ্তীয়ে ৷ বিশেষকৈ চৰকাৰী ৰাজহৰ ধনেৰে গধুৰ কৰিছিল নিজৰ জেপ ৷ ছাগলীয়াত বন বিভাগে তেৰটাকৈ শিল ডিপোৰ অনুমতি দি ডাম্পিঙৰ ব্যৱস্থা কৰি দিছিল ৷ কিন্তু দীৰ্ঘদিনে এই ডাম্পিং ডিপোসমূহৰ হোৱা নাই অনুঞ্জাপত্ৰৰ নবীকৰণ ৷ আৰু এনেদৰেই ছাগলীয়া হৈ আগমনি হালাকুৰা আৰু গোলকগঞ্জ মাজেৰে শিলৰ অভাৰলোড  ট্ৰাক উপস্হিত হৈছিল সীমান্তত ৷

সোণাহাট আন্তঃৰাষ্ট্ৰীয় সীমান্তৰে শিলৰ বৃহৎ ছিণ্ডিকেটৰ যোগেদি ট্ৰাক গৈছে বাংলাদেশলৈ৷  কিন্তু কেৱল ডি এছ পিক গ্ৰেপ্তাৰ কৰিলেই উৎখাত হ'বনে শিলৰ ছিণ্ডিকেট? তদন্তত সাঙোৰ খাই পৰিব নেকি আন আন বিভাগ আৰু বিভাগৰ বিষয়া কৰ্মচাৰীৰ নাম ?