Flood situation of ‍Barpeta: বৰপেটাত বান পৰিস্থিতি জটিল, শিবিৰত আশ্ৰয় লোৱা লোকসকলক খাদ্য, খোৱাপানী আদিৰ যোগান নধৰাৰ অভিযোগ

বৰপেটাত বান পৰিস্থিতি জটিল। নেৰানেপেৰা বৰষুণৰ ফলত বৰপেটা জিলাত ব্ৰহ্মপুত্ৰ আৰু ইয়াৰ উপনৈসমূহৰ জলপৃষ্ঠ দ্রুতগতিত বৃদ্ধি হৈ থকাৰ ফলত বৰপেটা জিলাৰ বান পৰিস্থিতি ক্ৰমাৎ জটিল হৈ পৰিছে । নৈকেইখনৰ বাঢ়নী পানীয়ে বৰপেটা আৰু বজালী জিলাৰ ৮টা ৰাজহ চক্ৰৰ শতাধিক গাঁও জলমগ্ন কৰিছে। বিশেষকৈ টিহু, পল্লা আৰু বুঢ়াদিয়া নৈৰ বাঢ়নী পানীয়ে বহু পৰিয়ালৰ ঘৰ-দুৱাৰ বুৰাই পেলোৱাৰ ফলত ৰাইজৰ মাজত হাহাকাৰ পৰিস্থিতিৰ সৃষ্টি হৈছে।

বাঢ়নী পানীয়ে অতি গুৰুত্বপূৰ্ণ বৰপেটা-হাউলী পথ, বৰপেটা-কয়াকুছি- ভৱানীপুৰ গড়কাপ্টানী পথ, সৰ্থেবাৰী-নগাঁও-বৰপেটা সংযোগী পথৰ ওপৰেৰে কেবাঠাইতো পানী বাগৰিছে ৷

ইপিনে দীৰ্ঘদিন ধৰি হৈ থকা নেৰানেপেৰা বৰষুণৰ ফলত বৰপেটা, বৰপেটা ৰোড, হাউলী আদি চহৰৰ বহু ৱাৰ্ডৰ বাট-পথ পানীত ডুব যোৱাৰ লগতে চহৰসমূহৰ বহু পৰিয়ালৰ ঘৰৰ ভিতৰতো একাঠু পৰ্যন্ত পানীত ডুব গৈছে ৷

বৰপেটাৰ জটিল বান পৰিস্থিতিৰ মোকাবিলা কৰাৰ বাবে NDRF, SDRF ৰ জোৱানসকল সাজু হৈ থকাৰ লগতে সেনাবাহিনীৰ সৈতেও যোগাযোগ ৰখা হৈছে ৷ ইপিনে বৰপেটাত কেইবাটাও শিবিৰ স্থাপন কৰা হৈছে যদিও শিবিৰত আশ্ৰয় লোৱা লোকসকলক খাদ্য, খোৱাপানী আদিৰ যোগান নধৰা বুলি অভিযোগ কৰিছে বানাক্ৰান্তই ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।