Nalbari News: ঐতিহাসিক বালিলেছা কালীসাগৰ পুখুৰীত আৰম্ভ হ'ল বৰশী বোৱা প্ৰতিযোগিতা

নলবাৰী, ২৫ মাৰ্চ: অসমৰ অন্যতম শক্তিপীঠ নলবাৰী জিলাৰ শ্ৰীশ্ৰীকালী দেৱালয়ৰ বিশাল ৩২ বিঘা মাটিকালিৰে আৱৰা কালী সাগৰ পুখুৰীত প্ৰথম বাৰৰ বাবে বৰশী বোৱাৰ প্ৰতিযোগিতা মূলক ব্যৱস্থা কৰিছে । উল্লেখযোগ্য যে দশম শতিকাত প্ৰতিষ্ঠিত কালী দেৱালয়খনৰ উন্নয়নৰ প্ৰধান উৎস হৈছে কালী সাগৰ পুখুৰী ।

প্ৰতি তিনি বছৰৰ মূৰত কালী সাগৰ পুখুৰী নিলাম হয় । নিলাম কৰি মাছৰ নামত পোৱা টকা মন্দিৰ উন্নয়নত ব্যৱহাৰ কৰা হয় । এইবাৰ বালিলেছা গাৱঁৰ স্থানীয় কেইজনমান উদ্যমী যুৱকে ৪ লাখ ৬৩ হাজাৰ টকাত নিলামত লয় পুখুৰীটো । উল্লেখযোগ্য যে উদ্যমী যুৱক সকলে মাছ মৰাৰ প্ৰাকমুহুৰ্তত কালী গোসাঁনীৰ ওচৰত ভোগ আগবঢ়াই বৰশী বোৱাৰ এক প্ৰতিযোগিতামূলক ব্যৱস্থা কৰিছে ।

উল্লেখযোগ্য যে, এইবেলি বালিলেছা কালী সাগৰ পুখুৰীৰ মাছ আন বছৰৰ তুলনাত অধিক ডাঙৰ হৈছে । ৰৌ, ভকুৱা, কমনকাৰ্প মাছ ১০ কেজিৰ পৰা ১৫ কেজি পৰ্যন্ত হৈছে । বাকী আন আন মাছবোৰো ভবাতকৈ বহুগুণে ডাঙৰ হৈছে যাৰ বাবে সমগ্ৰ নলবাৰী জিলাৰ পৰা বৰশী বোৱাৰ প্ৰতি ধাউতি থকা সকলে আহি বৰশী বোৱাত ব্যস্ত হৈ পৰিছে ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।