কেন্দ্ৰীয় মন্ত্ৰী হিচাপে কিমান সফল আছিল তৰুণ গগৈ? পেপচি, ডেলমণ্টে আৰু কেএফচিক ভাৰতলৈ অনাত লৈছিল বিশেষ ভুমিকা

১৯৯১চনত তদানীন্তন প্ৰধানমন্ত্ৰী পিভি নৰসিংহ ৰাও আৰু বিত্তমন্ত্ৰী ড৹ মনমোহন সিঙে মুকলি কৰিছিল মুক্ত বজাৰ অৰ্থনীতি । ইয়াৰ দ্বাৰা বিদেশী প্ৰতিষ্ঠানে বিশাল ভাৰতীয় বজাৰত সামগ্ৰী আৰু সেৱা বিক্ৰী কৰাৰ পথ প্ৰশস্ত হৈছিল। এই নৰসিংহ ৰাওৰ কেবিনেটতে গগৈ আছিল ফুড প্ৰচেছিং বিভাগৰ স্বতন্ত্ৰ মন্ত্ৰী। বিদেশী খাদ্য সামগ্ৰী প্ৰতিষ্ঠান সমূহক দেশলৈ অনাৰ গুৰু দায়িত্ব পৰিছিল গগৈৰ ওপৰত। গগৈয়ে ৰঙা ফিটাৰ মেৰপেছ হ্ৰাস কৰি সেই প্ৰতিষ্ঠান সমূহে যাতে সহজে ‘processing unit’ বহাই সামগ্ৰী বজাৰত মেলিব পাৰে সেই দিশত গুৰুত্ব আৰোপ কৰিছিল।

জ্যেষ্ঠ সাংবাদিক জয়ন্ত ৰয় চৌধৰীয়ে তৰুণ গগৈৰ বৰ্ণিল জীৱন পৰিক্ৰমাৰ এই অংশ বিস্তাৰে ৰোমন্থন কৰিছে। ১৯৯৩ চনত তেওঁ বিনোদ মেহতাৰ সম্পাদিত ইংৰাজী দৈনিক ‘দ্যা পায়নিযাৰ’ৰ সাংবাদিক আছিল আৰু তেওঁক নতুনকৈ গঠিত ফুড প্ৰচেছিং মন্ত্ৰণালয়ৰ বাতৰি সংগ্ৰহ কৰাৰ দায়িত্ব প্রদান কৰা হৈছিল। সেই সময়ত এছিয়াড ভিলেজৰ অস্থায়ী কাৰ্যালয়ৰ পৰা মন্ত্ৰণালয় পৰিচালিত হৈছিল।

ৰয় চৌধৰীয়ে কয় – ‘কেন্দ্ৰীয় মন্ত্ৰী তৰুণ গগৈয়ে বিহাৰ কেডাৰৰ আই এ এছ বিষয়া মন্ত্ৰণালয়ৰ যুটীয়া সচিব চি কে বসুৰ সহযোগত উৎকৃষ্ট কাম কৰিবলৈ সক্ষম হৈছিল। দুয়ো এক প্ৰকাৰ হাতত ধৰি পেপচি, ডেলমণ্টে আৰু কেএফচিক ভাৰতলৈ আনিছিল। ঠিক তেনেদৰে প্ৰধানমন্ত্ৰী মোৰাৰজি দেশাই আৰু উদ্যোগ মন্ত্ৰী জৰ্জ ফাৰ্নেণ্ডেজে ১৯৭৭ চনত পুলিয়ে পঘাই খেদি পঠিওৱা কোকা-কোলাকো দেশলৈ পুনৰ আনিছিল গগৈয়ে। ৰয় চৌধৰীৰ মতে ভাৰতীয় বজাৰত এক চমক প্রদান কৰিবলৈ সক্ষম হৈছিল গগৈ আৰু বসুৰ যুটিয়ে।

উল্লেখযোগ্য যে, গগৈয়ে দেশত প্ৰথমবাৰৰ বাবে অঞ্চল বিশেষে ৰাইজে কেনে ধৰণৰ খাদ্য খাই ভাল পাই এই সন্দৰ্ভত এক সমীক্ষা কৰিছিল। ৰয় চৌধৰীৰ মতে, তাৰ আগলৈকে পোৱা মাত্ৰকে খাব পৰা টোপোলা খাদ্য প্ৰস্তুত কৰা প্ৰতিষ্ঠান সমূহৰ ধাৰণা আছিল যে, ভাৰতীয় মানুহে কেৱল আলু ছিপচ্ আৰু বিলাহী চচ খাই ভাল পায়। কিন্তু এই সমীক্ষাৰ ফলাফলে এই ধাৰণা ভুল প্ৰমাণিত কৰিছিল আৰু প্ৰতিষ্ঠান সমূহে এই ফলাফলৰ ভিত্তিতে বজাৰত সামগ্ৰী মুকলি কৰিছিল ।