শোণিতপুৰৰ বৰছলাত প্ৰশাসনৰ উচ্ছেদ অভিযান, অৰ্ধশতাধিক ঘৰত পৰিল জেচিবিৰ হাতোৰা

বিজেপি নেতৃত্বাধীন চৰকাৰখনে চৰকাৰী ভূমি বেদখলমুক্ত কৰাৰ প্ৰতিশ্ৰুতি দি বেদখলকাৰীৰ বিৰুদ্ধে উচ্ছেদ অভিযান অব্যাহত ৰাখিছে৷ বুধবাৰে শোণিতপুৰৰ বৰছলা সমষ্টিৰ গৰুডুবা, ভৰাশিঙৰী, ধিৰাইমাজুলিত প্ৰশাসনে বৃহৎ চৰকাৰী ভূমি বেদখলমুক্ত কৰিলে৷

বৰছলাৰ এই অঞ্চলসমূহত দীৰ্ঘদিন ধৰি বৃহৎ চৰকাৰী ভূমি বেদখল কৰি গাঁও পাতি বসবাস কৰিছিল একাংশ সংখ্যালঘু সম্প্ৰদায়ৰ লোকে৷ অৱশেষত চৰকাৰী ভূমি বেদখল কৰি থকা বেদখলকৃত ভূমিত প্ৰশাসনৰ হাতোৰা পৰিল৷ শোণিতপুৰ জিলা প্ৰশাসনৰ হৈ অতিৰিক্ত উপায়ুক্ত সত্যজিত চেতিয়া, জিলা দণ্ডাধীশ ৰোহন ঝা, অতিৰিক্ত আৰক্ষী অধীক্ষক নোমল মাহাতো, ঢেকিয়াজুলি আৰু ঠেলামৰাৰ ৰাজহচক্ৰ বিষয়াৰ নেতৃত্বত চলা এই উচ্ছেদ অভিযানত বৃহৎ আৰক্ষী, অৰ্ধসামৰিক বাহিনী, অগ্নিনিৰ্বাপক বাহিনী মোতায়েন কৰা হয়৷

চাৰিখনকৈ জেচিবি, ট্ৰেক্টৰ  লৈ প্ৰশাসনে চলালে এই উচ্ছেদ অভিযান৷ প্ৰশাসনে জানিবলৈ দিয়া মতে, বৰছলাৰ গৰুডুবা, ভৰাশিঙৰী, ধীৰাইমাজুলি আদি অঞ্চলত চৰকাৰী ভূমিত বসবাস কৰা প্ৰায় অৰ্ধ শতাধিক বাসগৃহ জেচিবি-লগাই উচ্ছেদ কৰা হৈছে।

উল্লেখযোগ্য যে বৰছলা সমষ্টিৰ উক্ত বৃহৎ অঞ্চলটোৰ বৃহৎ চৰকাৰী ভূমি বেদখলমুক্ত কৰাৰ বাবে বিভিন্ন দল–সংগঠনে চৰকাৰক দাবী জনাই আহিছিল৷ অৱশেষত চৰকাৰ–প্ৰশাসনে প্ৰতিশ্ৰুতি দি প্ৰতিশ্ৰুতি ৰাখিলে৷ চৰকাৰ–প্ৰশাসনৰ এই পদক্ষেপক আদৰণি জনাইছে বিভিন্ন মহলে৷

তাৎপৰ্যপূৰ্ণভাৱে দেখা গ'ল যে এই অভিযানত PMAY আঁচনিৰ অধীনত লাভ কৰা চৰকাৰী বাসগৃহও ভাঙি পেলোৱা হ'ল৷ অৰ্থাত বে-দখল কাৰীয়েও বৰছলা সমষ্টিত পাইছিল চৰকাৰী আঁচনিৰ বাসগৃহও৷ যি আজি বে-দখলকাৰীৰ গৃহ বুলি প্ৰমাণিত হ'ল৷