'আগৰ সেইদিন নাই, সত্ৰৰ মাটি, চৰকাৰী মাটি বেদখল নকৰিব'- নমাটি-মৈৰামাৰা সত্ৰৰ ভূমি বেদখলমুক্ত কৰি হুংকাৰ দিলে মন্ত্ৰী  ৰণজিৎ দাসে

'আগৰ সেই দিন নাই। গতিকে সত্ৰৰ মাটিয়েই হওক বা চৰকাৰী মাটি বা ব্যক্তিগত মাটিয়েই হওক,  বেদখল নকৰিব ৷'-নমাটি-মৈৰামাৰা সত্ৰৰ ভূমি বেদখলমুক্ত কৰি এই হুংকাৰ দিলে যোগান মন্ত্ৰী ৰণজিৎ কুমাৰ দাসে।

উল্লেখ্য যে,  বৰপেটাৰ নমাটি-মৈৰামাৰা সত্ৰৰ ৰাজহুৱা শ্মশানৰ ভূমি একাংশ লোকে বেদখল কৰাৰ লগতে  সত্ৰৰ শ্মশানৰ ভূমি উন্নয়ন আৰু খেতি কৰাতো বাধা প্ৰদান কৰি আহিছিল একাংশ বেদখলকাৰীয়ে। বেদখলকাৰীৰ এনে দপদপনিৰ পিছত সত্ৰবাসী ৰাইজৰ অভিযোগৰ ভিত্তিত নমাটি-মৈৰামাৰা সত্ৰত উপস্থিত হয় বৰপেটা জিলাৰ অভিভাৱক মন্ত্ৰী ৰণজিৎ কুমাৰ দাস ৷ আৰু মন্ত্ৰীগৰাকীৰ লগতে জিলা উপায়ুক্ত, আৰক্ষী অধীক্ষকৰ আৰু জিলা প্ৰশাসনৰ  বিষয়াৰ উপস্থিতিত বেদখলমুক্ত কৰা হয় সত্ৰৰ ভূমি।

সত্ৰখনৰ প্ৰায় ২৪ বিঘা ভূমি বেদখলৰ বাবে চেষ্টা চলাই আহিছিল কিছু সংখ্যক সন্দেহজনক লোকে। গতিকে বেদখলমুক্ত কৰি সেইসকল লোকক সাৱধানবাণী শুনাই মন্ত্ৰীগৰাকীয়ে কয় যে,   'সত্ৰৰ মাটি হওক বা চৰকাৰী মাটি বা ব্যক্তিগত মাটি বেদখল নকৰিব ৷ মছজিদ বা গীৰ্জাৰ মাটি বেদখল হ'লেও তৎকালীনভাৱে উচ্ছেদ কৰিব চৰকাৰে ৷ সকলোৱে যাতে ন্যায় লাভ কৰে সেইমতে চৰকাৰে ব্যৱস্থা ল'ব ৷ ভূমিহীন আৰু গৃহহীনসকলে চৰকাৰী নীতি অনুসৰি ভূমি আৰু গৃহ লাভ কৰি আহিছে ৷ ভূমিহীন হ'ল বুলিয়েই সত্ৰ, মছজিদ বা দৰগাহৰ মাটি বেদখল কৰাতো সহ্য কৰা নহ'ব ৷ অবৈধ বেদখল উচ্ছেদৰ বাবে জিলা উপায়ুক্তসকলক ক্ষমতা দিয়া হৈছে ৷'

ইয়াৰ উপৰিও  ধুবুৰীতো বন ভূমি আৰু বন বিভাগৰ প্ৰস্তাৱিত ভূমিত চলি থকা বেদখল উচ্ছেদৰ বাবে চৰকাৰে নিৰ্দেশ দিছে বুলি জানিবলৈ দিয়ে মন্ত্ৰী দাসে। ইপিনে বাঘবৰত থকা বৰপেটাৰ ভূমিত চলি থকা বেদখল উচ্ছেদৰ বাবে বৰপেটা সত্ৰ সমিতিয়ে লিখিতভাৱে আবেদন জনোৱাৰ এসপ্তাহৰ ভিতৰত সত্ৰৰ ভূমি বেদখল মুক্ত কৰা হ'ব বুলি মন্তব্য কৰে ৰণজিৎ কুমাৰ দাসে ৷