ঢেঁকীয়া বিক্ৰি কৰি জীৱন নিৰ্বাহ নগাঁও কাগজ কলৰ বাসিন্দাৰ। অন্তিম আশাকণো হ'ল নিৰ্বাপিত।

১৯৮৫চনত সম্ভাৱনাৰ সপোনৰেই আৰম্ভ হৈছিল জাগীৰোডস্থিত নগাঁও কাগজ কল ৷ কাগজ কলৰ দ্বাৰাই চলিছিল সহস্ৰাধিক পৰিয়ালৰ ঘৰ ৷ হঠাৎ ২০১৭ত বন্ধ হৈ গ'ল নগাঁও আৰু কাছাৰ কাগজ কল ৷ কিছু আশালৈ কল দুটা খুলিব বুলি ৰৈ আছিল কৰ্মচাৰী তথা পৰিয়াল ৷ পিছে সকলোকে আশাহত কৰি কল দুটা নিলামৰ জাননী দিলে মূল লিকুইডেটৰ কুলদিপ বাৰ্মাই ৷ উকা কাগজৰ উচুপনি লৈ নিলাম হ'ব দুয়োটা কাগজ কল ৷ যাক লৈ দিকভ্ৰান্ত কাগজ কলৰ কৰ্মচাৰী,পৰিয়াল ৷

প্ৰথমে এগৰাকী মহিলাৰ কাহিনীকে শুনক ৷ বাস্তৱ কিমান কঠিন হৈ পৰিলে মানুহ বাধ্য হয় জীৱন সংগ্ৰামৰ আন বাট মোকলাবলৈ সেয়া প্ৰত্যক্ষ কৰিলেহে অনুভৱ কৰিব পাৰি ৷ আমি লগ পাইছিলোঁ ঢেঁকীয়া বুটলি থকা এগৰাকী মহিলাক ৷ মহিলা গৰাকীৰ নাম মালতী দৈমাৰী ৷

মালতী দৈমাৰীৰ স্বামী নৰেণ দৈমাৰী কৰ্মৰত আছিল নগাঁও কাগজ কলতে ৷ উকা কাগজতে সপোন ৰচিছিল তিনি সন্তানৰে মালতীৰ পৰিয়ালে ৷ পিছে সকলো থান-বান হ'ল ২০১৭ত কাগজ কল বন্ধ হোৱাত ৷

অভিযন্তা হ'ব নোৱাৰিলে মালতীৰ বৰ পুত্ৰ ৷ মাজু পুত্ৰই লকডাউনৰ বাবে এৰিবলগীয়া হ'ল হোটেলৰ চাকৰি ৷ সৰু ছোৱালীজনীও হৈছে এতিয়া পঢ়াত বাধাগ্ৰস্ত ৷

মালতী দৈমাৰীয়ে দৈনিক এতিয়া ঢেকীয়া বোটলে ৷ মুঠা মুঠাকৈ বন্ধা ঢেঁকীয়া বিক্ৰী কৰি ঘৰ চলায় এসময়ত স্বচ্ছল জীৱন যাপন কৰা মালতীয়ে ৷ প্ৰতিমুঠি ঢেকীয়াত লাভ কৰা দহটকাৰে দিনটোত প্ৰায় দেৰশৰ পৰা দুশ টকা লাভ কৰে মালতীয়ে ৷ তেনেকৈয়ে চলিছে ঘৰ ৷

মালতী দৈমাৰী তথাপি হোৱা নাই বিচলিত ৷ বিশ্বাস ৰাখিছে এতিয়াও নেদেখাজনৰ ওপৰত ৷ হুমুনিয়াহ কাঢ়িয়েই চাৰিবছৰ ধৰি সংগ্ৰাম কৰি থকা কাগজ কলৰ কৰ্মচাৰীৰ পত্নী মালতী দৈমাৰীয়ে আমাক ক'লে,"কষ্ট বহুত হৈছে ৷ ঘৰখন চলিবই লাগিব ৷ ঢেঁকীয়া এমুঠিত দহ টকা লওঁ ৷ দুই এক লোকে সেয়াও দিব নিবিচাৰে ৷ কাকো দোষ দিবও নিবিচাৰোঁ ৷ এয়া কঠিন সময় ৷ সকলো প্ৰত্যাহ্বান লৈ কষ্ট কৰি গৈছোঁ ৷ চাউল ফ্ৰীতে পাইছোঁ ৷ কিন্তু দাইলকে ধৰি আন সামগ্ৰীবোৰো লাগে ৷ ঢেকীয়া বিক্ৰী কৰি ডেৰশ টকা পালে তাৰে পঞ্চাশ টকা সাচোঁ ৷ বন্ধনৰ ঋণখিনি দিয়াৰ বাবেও সদায় হেঁচা থাকে ৷ ঈশ্বৰক ধিয়াই চলি আছোঁ ৷ চলি থাকিম ৷ আশাহত হোৱা নাই মই ৷"

মালতী দৈমাৰীৰ দৰে বহু পৰিয়াল এতিয়া দিকভ্ৰান্ত ৷ চৰকাৰে নিৰ্বাচনী প্ৰতিশ্ৰুতি ভংগ কৰাক লৈ ক্ষোভিত সকলো ৷ তথাপি তাৰ মাজতে মুখ্যমন্ত্ৰী  হিমন্ত বিশ্ব শৰ্মাই কিবা এটা কৰিব বুলি আশাবাদী বহু কৰ্মচাৰী ৷ এতিয়া এয়াই পৰিৱেশ কাগজ কলৰ ৷ যি উকা কাগজত সপোন ৰচিছিল সেই উকা কাগজতে এতিয়া মালতী দৈমাৰীহঁতৰ দৰে লোকৰ উচুপনি ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।