আলু–পিঁয়াজৰ পিছত এইবাৰ হোৰাহোৰে বাঢ়িছে কণীৰ দাম

আলু বা পিঁয়াজ নহয়, এইবাৰ হোৰাহোৰে বৃদ্ধি হৈছে কণীৰ দাম। এপ্ৰিল মাহত তথা লকডাউনৰ সময়ত প্ৰতি প্লেট কণীৰ দাম ১১০ৰ পৰা ১২০ টকা আছিল। কিন্তু, ছেপ্টেম্বৰ মাহৰ অন্তিম ফালে পাইকাৰী বজাৰত প্ৰতিপ্লেট কণীৰ মূল্য হয়গৈ ১৭৫ টকা। মহানগৰীৰ লগতে ৰাজ্যৰ অন্যান্য প্ৰান্তৰ পাইকাৰী ব্যৱসায়ীসকলে প্ৰতি কাৰ্টন কণী বিক্ৰী কৰিববগীয়া হৈছে ১২০০ ৰ পৰা ১৩০০ টকাপৰ্যন্ত।

আগষ্ট মাহৰ পৰা ছেপ্টেম্বৰ মাহৰ শেষলৈ প্ৰতিকাৰ্টন কণীৰ মূল্য বৃদ্ধি হৈছে ৩০০ টকালৈ।আগষ্ট  মাহত প্ৰতি কাৰ্টন কণীৰ মূল্য আছিল ১০০০ টকা। অন্ধ্ৰ প্ৰদেশ আৰু হাৰিয়ানাৰ পৰা ৰপ্তানি হোৱা কণীৰ মূল্য দৈনিক বৃদ্ধি হোৱাৰ ফলত এতিয়া কণী ক্ৰয় কৰাত অসুবিধাৰ সন্মুখীন হৈছে সাধাৰণ ৰাইজ।

ইফালে, ৰাজ্যত অস্বাভাৱিক হাৰত অত্যাৱশকীয় সামগ্ৰীৰ মূল্যই ৰাইজক জুৰুলা কৰাৰ বাবে বিভিন্ন সংগঠনে সাব্যস্ত কৰিছে প্ৰতিবাদ। কণীৰ লগতে আন আন সামগ্ৰীৰ দৈনিক মূল্যবৃদ্ধি হোৱাৰ পিছতো এতিয়াও কুম্ভকৰ্ণ নিদ্ৰাত যোগান বিভাগ।