এইবাৰ কেনেদৰে পুজা অনুষ্ঠিত হ’ব যোৰহাটৰ ঐতিহ্যমণ্ডিত বুঢ়ী গোঁসানী দেৱালয়ত?

News18 Assam | News18-Assam
Updated:October 22, 2020, 2:10 PM IST
এইবাৰ কেনেদৰে পুজা অনুষ্ঠিত হ’ব যোৰহাটৰ ঐতিহ্যমণ্ডিত বুঢ়ী গোঁসানী দেৱালয়ত?
জনসাধাৰণৰ মাজত এই দেৱালয়ৰ প্ৰতি আছে অগাধ বিশ্বাস। সেয়েহে বিদেশৰ পৰাও এই শক্তিপীঠলৈ দুৰ্গা পূজাৰ দিনকেইটাত আগমন ঘটে ভক্তসকলৰ।

জনসাধাৰণৰ মাজত এই দেৱালয়ৰ প্ৰতি আছে অগাধ বিশ্বাস। সেয়েহে বিদেশৰ পৰাও এই শক্তিপীঠলৈ দুৰ্গা পূজাৰ দিনকেইটাত আগমন ঘটে ভক্তসকলৰ।

  • Share this:
বিগত ২২৬ বছৰ ধৰি যোৰহাটৰ ঐতিহাসিক বুঢ়ী গোঁসানী দেৱালয়ত জাক–জমকতা বিহীনভাৱে পালন কৰি অহা হৈছে দুৰ্গা পুজা। এই জাগ্ৰত শক্তিপীঠখনলৈ জাতি–ধৰ্ম–বৰ্ণ নিৰ্বিশেষে কেৱল অসমেই নহয়, ভাৰতৰ বিভিন্ন প্ৰান্তৰ লগতে বিদেশৰ পৰাও অগণন ভক্তৰ আগমন ঘটে। কিন্তু এইবাৰ কভিড পৰিস্থিতিৰ বাবে বুঢ়ী গোঁসানী দেৱালয়ত দেখা পোৱা নাযাব পূৰ্বৰ দৰে পৰিৱেশ।

ঐতিহ্য আৰু লোকবিশ্বাস :
অসমৰ ভিতৰতে এখন অন্যতম ঐতিহ্যমণ্ডিত শক্তিপীঠ হৈছে যোৰহাটৰ গড়আলিৰ সমীপৰ বুঢ়ী গোঁসানী দেৱালয়। ১৭৯৪ চনত আহোমৰ শেষ ৰাজধানী যোৰহাটত স্থাপন কৰা সময়তে যোৰহাটত প্ৰতিষ্ঠা কৰা হৈছিল এই দেৱালয়। আহোম ৰজা ৰুদ্ৰ সিংহই জয়ন্তীয়া ৰজাক যুদ্ধত হৰুৱাই দেৱীক গড়গাঁওস্থিত ৰাজধানীত প্ৰতিষ্ঠা কৰিছিল। বিশ্বাস আছিল যে এই দেৱীক আগত লৈ যুদ্ধলৈ গ’লে যুদ্ধ জয়ী হয়। ১৭৯৪ চনৰ পৰা বিগত ২২৬ বছৰ ধৰি এই দেৱালয়ত নিতৌ পূজা–অৰ্চনা কৰি অহা হৈছে। তাৎপৰ্যপূৰ্ণ ভাৱে এই দেৱালয়ত প্ৰতিমা নাই। এক অন্যতম শক্তি পীঠ ৰূপে পৰিচিত এই দেৱালয়।

জনসাধাৰণৰ মাজত এই দেৱালয়ৰ প্ৰতি আছে অগাধ বিশ্বাস। সেয়েহে বিদেশৰ পৰাও এই শক্তিপীঠলৈ দুৰ্গা পূজাৰ দিনকেইটাত আগমন ঘটে ভক্তসকলৰ। পূজাৰ কেইদিনত এই দেৱালয়ত বিৰ দি বাট পাবলৈ নোহোৱা পৰিৱেশৰ সৃষ্টি হয়। আনহাতে পৰম্পৰা অনুসৰি পূজাৰ আটাইকেইদিনতে ইয়াত বলি–বিধান হয়। জনবিশ্বাস অনুসৰি এই দেৱালয়ত দেৱীৰ সেৱা কৰিলে মনৰ আশা পূৰণ হয়। আৰু সেই বাবেই এই শক্তিপীঠলৈ অসম তথা ভাৰতৰ বিভিন্ন প্ৰান্তৰ পৰা অগণন ভক্তৰ সমাগম ঘটে।

এইবাৰ দেৱালয়ত কেনেদৰে অনুষ্ঠিত হ’ব পুজা :
কোভিড পৰিস্থিতিৰ বাবে এইবাৰ যোৰহাটৰ ঐতিহ্যমণ্ডিত বুঢ়ী গোসানী দেৱালয়ত দেখা পোৱা নাযাব পূৰ্বৰ পৰিৱেশ। দৈনিক হাজাৰ হাজাৰ লোকে ভিৰ কৰা এই দেৱালয়ত এইবাৰ সালসলনি ঘটোৱা হৈছে বহু নিয়মৰ। দেৱালয় চৌহদত এবাৰত পঞ্চাশ গৰাকী লোককহে প্ৰৱেশ কৰিবলৈ দিয়া হ’ব। সকলোৱে মাস্ক পৰিধান কৰাটো বাধ্যতামূলক। আনহাতে পূৰ্বৰ দৰে চাকি-বন্তি জ্বলাব নোৱাৰিব। তাৰ পৰিৱৰ্তে দেৱালয়ৰ নিৰ্দিষ্ট স্থানত থোৱা কেইগছিমান চাকিত তেল দিব পাৰিব ভক্তসকলে। এইবাৰ দেৱালয়ত শৰাই লোৱা নহয় তথা শৰাইৰ সামগ্ৰী তথা নিৰ্মালিও লোৱা নহয়।

"কোভিড–১৯ পৰিস্থিতিৰ পৰিপ্ৰেক্ষিতত এইবাৰ দেৱালয়ত ভক্তৰ সমাগমৰ ক্ষেত্ৰত বহুখিনি নিয়ম বলৱৎ কৰা হৈছে। এইবাৰ শৰাই লোৱা নহয় তথা বলিৰ বাবে উৎসৰ্গাও লোৱা নহয়। ভক্তসকলে নিৰ্দিষ্ট স্থানত থোৱা চাকিত তেলহে দিব পাৰিব। এবাৰত চৌহদত ৫০ গৰাকী ভক্তহে প্ৰৱেশ কৰিব পাৰিব",  বুঢ়ীগোঁসানী দেৱালয় পৰিচালনা সমিতিৰ সভাপতি প্ৰশান্ত বৰুৱাই এনেদৰে কয়।

এই দেৱালয়ত পৰম্পৰা অনুসৰি প্ৰতিবছৰে পূজাৰ কেইদিনত বলি দিয়া হয়। শ শ ভক্তই বলিৰ বাবে উছৰ্গা কৰেহি হাঁহ, পাৰ, ছাগলী। কিন্তু এইবাৰ কোভিড পৰিস্থিতিৰ বাবে ভক্তসকলৰ পৰা গ্ৰহণ কৰা নহয় বলি। দেৱাল কৰ্তৃপক্ষই নিজাববীয়াকৈহে অনুষ্ঠিত কৰিব বলি।

ইতিমধ্যে দেৱালয়ৰ সৈতে জড়িত লোকসকলৰ কোভিড পৰীক্ষা হৈ গৈছে। দেৱালয়ত কৰা হৈছে ছেনিটাইজেছনৰ ব্যৱস্থা। মুঠৰ ওপৰত এইবাৰ পূজাত এক সুকীয়া অভিজ্ঞতাৰ সন্মুখীন হ’ব সকলো।
Published by: Sanjay Kumar Das
First published: October 22, 2020, 2:10 PM IST
আৰু চাওক
পৰৱৰ্তী বাতৰি

শেহতীয়া বাতৰি

corona virus btn
corona virus btn
Loading