লক্ষ্মী পূজাত এমুঠি ধানৰ বাবে হাহাকাৰ দুধনৈৰ এখন গাঁৱৰ ৰাইজৰ...

লক্ষ্মী পূজাত এমুঠি ধানৰ বাবে হাহাকাৰ দুধনৈৰ এখন গাঁৱৰ ৰাইজৰ ৷ বিঘাই বিঘাই বিনষ্ট পকা ধান ৷ পথাৰত ধান বুলিবলৈ একোয়ে নাই , আছে মাথোঁ নৰা কেইডালহে ৷

আজি লক্ষ্মী পূজা ৷ ধন সম্পদৰ অধীষ্ঠাত্ৰী দেৱী লক্ষ্মী । সৌভাগ্য আৰু শান্তিৰ প্ৰতীক মা লক্ষ্মী ৷ সৌভাগ্য আৰু সমৃদ্ধিৰ বাবে ঘৰে ঘৰে লক্ষ্মী দেৱীৰ আৰাধনা কৰা হয় ৷ ধনৰ দেৱী লক্ষ্মীক আৰাধনাৰ বাবে ৰাজ্যৰ প্ৰান্তে-প্ৰান্তে চলিছে  পূজা-অৰ্চনা , কিন্তু দৰংগিৰিৰ এখন গাঁৱৰ একাংশ কৃষকৰ ঘৰত লক্ষ্মী পূজা কৰিবলৈ নাই এমুঠিও ধান ৷ কাৰণ বন্যহস্তীৰ উপদ্ৰৱ, যাৰ বাবে এতিয়া মূৰে-কঁপালে হাত দি চকুলো টুকিছে চেচাপানী গাঁৱৰ বহু কৃষকে ৷ বন্যহস্তীয়ে খাই তহিলং কৰিছে পকিবলৈ ধৰা পথাৰৰ ধান ৷ সমৃদ্ধিৰ দেৱী লক্ষ্মীক আদৰিবলৈ উচাহ নাই গাঁওবাসীৰ মাজত ৷ যোৱা এটা মাহ ধৰি প্ৰায় ৭০ / ৮০ টা বন্যহস্তীৰ এটা জাকে নিতৌ বিনষ্ট কৰিছে বিঘাই বিঘাই ধান খেতি ৷ সন্ধিয়া হ’লেই বনাঞ্চলৰ পৰা জনাঞ্চলত প্ৰৱেশ কৰি হাতীৰ জাকটোৱে এফালৰ পৰা চলাই গৈছে তাণ্ডৱ ৷ কেৱল নিশাই নহয় , দিনটো ধাননি পথাৰত নামি গাঁৱৰ চহা কৃষকৰ পথাৰৰ পকা ধান খাই চলাইছে সন্ত্ৰাস। এনেদৰে হাতীয়ে খাই তহিলং কৰিছে গাঁৱখনৰ প্ৰায় ৬০/৭০ বিঘা ধানৰ খেতি ৷ এতিয়া পথাৰত ধানৰ সলনি কেৱল মাথোঁ হাতীৰ খোঁজহে  দেখিবলৈ পোৱা যায় ৷ আতংকত দিন অতিবাহিত কৰাৰ লগতে উজাগৰী নিশা কটাব লগা হৈছে বৃহত্তৰ অঞ্চলটোৰ শ শ ৰাইজে ৷ বাৰিষা মূৰৰ ঘাম মাটিত পেলাই কৰা খেতিডৰা হাতীয়ে চকুৰ সমুখতে খাই শেষ কৰা দৃশ্য চাই হতাশগ্ৰস্ত এতিয়া কৃষকসকল, বন বিভাগৰো নাই কোনো তৎপৰতা ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।