সোণাৰিৰ নামতোলাত ২০ লক্ষাধিক টকাৰ ব্ৰাউন ছুগাৰ জব্দ, মহিলাসহ আটক তিনি

চৰাইদেউ জিলাৰ সোণাৰিৰ অসম–নগালেণ্ড সীমান্তৱৰ্তী নামতোলাত বৃহৎ পৰিমাণৰ নিষিদ্ধ ড্ৰাগছসহ ২ ড্ৰাগছ সৰবৰাহকাৰীক আটক। AS 33 C O385 নম্বৰৰ এখন অটোত নিষিদ্ধ ড্ৰাগছ সৰবৰাহ কৰাৰ সময়তে নামতোলা আৰক্ষীৰ অভিযানত জব্দ কৰা হয়  প্ৰায় ২৬০ গ্ৰাম ব্ৰাউন ছুগাৰ। জব্দকৃত ড্ৰাগছখিনিৰ মূল্য প্ৰায় ২০ লাখ টকা। ১৮টা চাবোনৰ বাকচত অনা হৈছিল ড্ৰাগছখিনি।

আনহাতে, আৰক্ষীৰ অভিযানৰ সময়ত দুই ড্ৰাগছ সৰবৰাহকাৰীক কঢ়িয়াই অনা অটোখনৰ চালককো আটক কৰে  আৰক্ষীয়ে। সম্প্ৰতি নামতোলা আৰক্ষী থানাত সোধা–পোছা অব্যাহত ৰাখিছে আৰক্ষীয়ে।

উল্লেখযোগ্য যে নাগালেণ্ডৰ মন জিলাৰ পৰা অসমৰ চৰাইদেউ জিলাৰ সোণাৰিৰ নামতোলা হৈ এই জব্দকৃত নিষিদ্ধ ব্ৰাউন‌ ছুগাৰ সৰবৰাহ কৰা বুলি চৰাইদেউ জিলাৰ নৱনিযুক্ত আৰক্ষী অধীক্ষক যুৱৰাজ সিঙে সংবাদ মাধ্যমৰ আগত সদৰি কৰিছে।

আনহাতে, বিগত কেইবা বছৰ ধৰি সোণাৰিৰ অসম নগালেণ্ডৰ সীমান্তৰ নামতোলা অঞ্চল অবৈধ ব্যৱসায় তথা অপৰাধজনিত কাৰ্যৰ এক ঘাটি তথা কৰিড’ৰ হিচাপে পৰিগণিত হৈ আহিছে। আৰক্ষীয়েও বিভিন্ন সময়ত ব্যাপক অভিযান চলাই অবৈধ ড্ৰাগছ ব্যৱসায়িক গ্ৰেপ্তাৰ কৰি আহিছে যদিও এই ঠাইত এনে অবৈধ ব্যৱসায় তথা অপৰাধৰ পৰা মুক্ত হোৱা নাই।