ভূমি বিবাদৰ ভয়ংকৰ পৰিণতি, ধুবুৰীত হানি–খুচি হত্যা দুজনক

এটুকুৰা মাটিৰ বাবে লংকাকাণ্ড ধুবুৰীৰ গৌৰীপুৰত। দুটা পৰিয়ালৰ পাৰিবাৰিক বিবাদৰ চুড়ান্ত পৰিণতিত প্ৰাণ গ’ল দুজনৰ। ধুবুৰীৰ গৌৰীপুৰ মুৰিয়ালীঘাটত আজি পুৱা এই  লোমহৰ্ষক হত্যাকাণ্ড সংঘটিত হয়।

ভূমি বিবাদক কেন্দ্ৰ কৰি সংঘটিত কাজিয়াত একে পৰিয়ালৰ দুজনক হানি–খুচি হত্যা। মৃত দুজনৰ নাম মন্তাজ আলী আৰু তেওঁৰ ভাই বোৱাৰী জেচমিনা বেগম।

ঘটনাস্থলীত আৰক্ষী উপস্থিত হোৱাৰ পূৰ্বেই হত্যাকাণ্ডৰ মূল অভিযুক্ত বাবুল আৰু মণ্টুৱে পলায়ন কৰে বুলি স্থানীয় ৰাইজে জানিবলৈ দিয়ে। স্থানীয় ৰাইজৰ মতে, পুৱাই চিঞৰ–বাখৰ শুনি তেওঁলোকে আহি পৰিয়াল দুটাৰ মাজত প্ৰচণ্ড মাৰপিট দেখা পায় আৰু লগে লগে তেজেৰে লুতুৰি–পুতুৰি হৈ থকা দুজনক ধুবুৰী সদৰ চিকিৎসালয় লৈ প্ৰেৰণ কৰে। কিন্তু চিকিৎসালয় পোৱাৰ পূৰ্বে মন্তাজড আলী আৰু জেচমিনা বেগমৰ মৃত্যু হয় বুলি জানিবলৈ দিয়ে।

ধুবুৰীৰ আৰক্ষী অধীক্ষক আনন্দ মিশ্ৰ ঘটনাস্থলীত উপস্থিত হৈ তদন্ত আৰম্ভ কৰিছে যদিও এতিয়ালৈকে মূল অভিযুক্ত গ্ৰেপ্তাৰ হোৱা নাই। ইপিনে, পুৱাই এনে লোমহৰ্ষক ঘটনা সংঘটিত হোৱাত সমগ্ৰ ঘটনাক কেন্দ্ৰ কৰি অঞ্চলটোত চেপা উত্তেজনা বিৰাজ কৰিছে।