ডবকাত বনৰীয়া হাতীৰ আক্ৰমণত এগৰাকী মহিলাৰ মৃত্য়ু, যমুনামুখত কথমপি ৰক্ষা পৰিল ই ৰিক্সা চালক আৰু যাত্ৰী ...

হোজাই আৰু কাৰ্বি আংলং জিলাৰ সীমান্তৱৰ্তী আকাশীগংগা হালধিআটিত আজি বনৰীয়া হাতীৰ আক্ৰমণত এগৰাকী মহিলাৰ মৃত্য়ু হোৱাৰ লগতে আন এগৰাকী মহিলা গুৰুতৰভাৱে আহত হোৱা ঘটনাই ত্ৰাসৰ সৃষ্টি কৰিছে৷

ডবকা আঞ্চলিক বন বিষয়়াৰ কাৰ্যালয়ৰ অন্তৰ্গত আকাশীগংগা  টঙীয়া গাৱত বনৰীয়া হাতীৰ আক্ৰমণত মৃত্যু হোৱা মহিলা গৰাকীৰ নাম চুকুমনি গৌড় বুলি জানিব পৰা গৈছে ৷ হাতীৰ জাকটোৱে ডবকা সংৰক্ষিত বনাঞ্চলত কালি সন্ধিয়া প্ৰৱেশ কৰিছিল বুলি কয় একাংশ লোকে , নিশা কাষতে থকা টঙীয়া গাওঁখনলৈ যায় জাকটোৱে৷ নিশা দহ মান বজাত চুকুমনি গৌড় নামৰ মহিলা গৰাকীয়ে আন এগৰাকী সহযোগীৰ সৈতে হালধীআটীৰ পৰা বজাৰ কৰি  নিজ গৃহ অভিমুখে গৈ থাকোতেই বন্যহস্তীৰ জাকটোৰ মুখামুখি হয় ৷ এগৰাকী মহিলা পলায় সাৰে যদিও চুকুমনি গৌড় নামৰ মহিলাগৰাকীৰ হাতীয়ে গচকত  মৃত্য়ু হয় ৷ গাওঁখনত প্ৰৱেশ কৰিয়েই হাতীৰ জাকটোৱে খাদ্য শস্য খাই তহিলং কৰাৰ লগতে তাণ্ডব চলায় ৷ খবৰ পোৱাৰ মাত্ৰকেই ঘটনাস্থলীত উপস্থিত হয় বনবিভাগৰ দল আৰু আৰক্ষীৰ লোক ৷ স্থানীয় ৰাইজৰ সহযোগত মৃতদেহতো উদ্ধাৰ কৰি মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে৷ যোৱা কিছুদিন ধৰি প্ৰতি নিশাই বন্যহস্তীৰ জাকে গাঁওখনত তাণ্ডব চলোৱাৰ কথা জানিবলৈ দিছে  স্থানীয় ৰাইজে৷

আনহাতে  হোজাইৰ যমুনামুখতো দিন  দুপৰতে বন্যহস্তীৰ জাকে তাণ্ডৱ আৰম্ভ কৰে ৷ যমুনামুখৰ চাংজুৰাই গাঁৱত অৱস্থান কৰা ১০০-১৫০ জনীয়া হাতীৰ জাক এটাই গাঁৱত থকা উৰিয়াম ঘাট ৰিজাৰ্ভত পুৱতি নিশাৰ পৰাই অৱস্থান কৰেহি ৷ দিন দুপৰতে *যমুনামুখ- কামপুৰ* সংযোগী পথত হাতীৰ জাকটোৱে অৱস্থান কৰাত আতংকৰ মাজত আছে অঞ্চলটোৰ জনতাই  ৷ উক্ত পথেৰে আহি থকা এখন ই ৰিক্সাক  এটা হাতীয়ে আক্ৰমণ কৰিবলৈ উদ্যত হয় যদিও কথমপি ৰক্ষা পৰে ই ৰিক্সাৰ চালকজনে৷ কথমপি প্ৰাণ ৰক্ষা পৰে ই-ৰিক্সা চালকৰ লগতে আৰোহীৰ। সম্প্ৰতি আতংকিত হৈ আছে চাংজুৰাই গাঁওবাসী, কিয়নো নিশা হ'লেই গাঁৱত হাতীৰ জাকটোৱে তাণ্ডৱ চলোৱাৰ ভয় তেওঁলোকৰ।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|