দেশ-বিদেশত থকা অসমৰ ১১ অভিযন্তাই পাতিলে ডিজিটেল বিহু

সমগ্ৰ দেশতে এতিয়া দ্বিতীয় পৰ্যায়ৰ লকডাউন৷ লকডাউনত আবদ্ধ সকলো৷ হেঁপাহৰ বিহুটিতো ঘৰলৈ আহিবলৈ সুবিধা নাপালে কৰ্মসূত্ৰে ৰাজ্য তথা দেশৰ বাহিৰত থকা লোকসকলে৷ তথাপিও আক্ষেপ নাই কাৰোৰে মনত৷ যেনেতেনে হ’লেও উদযাপন কৰিবই হেঁপাহৰ বিহুটি। সেয়ে হাতত ল’লে নতুন পন্থা৷ পাতিলে ডিজিটেল বিহু৷ আৰু এই বিহু পাতিলে কেইগৰাকীমান উদীয়মান অভিযন্তাই৷

কৰ্মসূত্ৰে তেওঁলোক থাকে বহিঃৰাজ্যৰ লগতে বিদেশত৷ কিন্তু বাপতিসাহোন ৰঙালী বিহুত এইবাৰ তেওঁলোক ঘৰলৈ আহিব নোৱাৰিলেও দূৰে দূৰে থাকি পাতিলে ডিজিটেল বিহু৷ নিজ নিজ গৃহৰ পৰাই পৰিৱেশন কৰিলে নিজ নিজ প্ৰতিভা৷ এজনে জুৰিলে বিহুগীত, কোনোবাই বজালে ঢোল, কোনোবাই পেঁপা, কোনোবাই বাঁহী বাকী যুৱতী কেইগৰাকীয়ে নাচিলে কঁকাল ভাঙি ভাঙি৷ এইসকল অসমৰ বিভিন্ন স্থানৰ, কিন্তু কৰ্মসূত্ৰে থাকে বাহিৰত৷



নাজিৰাৰ প্ৰিয়ম শইকীয়া এগৰাকী চছফ্টৱে’ৰ ডেভেল’পাৰ, থাকে বেংগালুৰুত। ডিডিবি মুদ্ৰা গ্ৰুপৰ চাকৰিয়াল৷ মৃণাল কলিতা, প্ৰছেছ ইঞ্জিনীয়াৰ থাকে কলকাতাত। আৰতি নেওগ, ডিজিটেল ইঞ্জিনীয়াৰ থাকে জাৰ্মানীত। প্ৰণামিকা গগৈয়ো চাকৰি কৰে এনআইটি, কৰ্ণাটকত৷ আৰু বাকী এইকেইজন অভিযন্তা ক্ৰমে পৰাণ বৰা, পল্লৱ জ্যোতি হাজৰিকা,  তিলকজ্যোতি মৰাণ, প্ৰিয়ংকা মেধি, লিনটন শইকীয়া, নৱজ্যোতি বৰুৱা আৰু  বিশাল জ্যোতি দাস কৰ্মসূত্ৰে আছে অসমৰে বিভিন্ন স্থানত৷



এটা সময়ত অসম অভিযান্ত্ৰিক মহাবিদ্যালয়ত পঢ়ি থকা দিনৰে পৰা তেওঁলোকে লগ লাগি বিহু পাতিছিল৷ কিন্তু লকডাউনৰ বাবে তেওঁলোক এইবাৰ লগ লাগিব নোৱাৰিলে কেনেকৈনো নপতাকৈ থাকে হেপাঁহৰ বিহুটি৷ সেইকাৰণে নিজ নিজ আৱাসিক স্থানৰ পৰাই নিজ প্ৰতিভাৰে ডিজিটেল বিহু পাতিলে এইসকল অভিযন্তাই৷ আৰু তেওঁলোকে কৰা এই ডিজিটেল বিহু বৰ্তমান জনপ্ৰিয় হৈ পৰিছে ছচিয়েল মিডিয়াত৷