ডিব্ৰুগড়ত ধন দাবী কৰি আৰক্ষীৰ জালত পৰিল জাতীয় সংগঠনৰ তিনিগৰাকী সদস্য

দীপাৱলীৰ আনন্দ উছাহৰ মাজতে ডিব্ৰুগড়ত শনিবাৰে ধন দাবী কৰি আৰক্ষীৰ জালত পৰিল অনুসূচিত জাতি সংগ্ৰামী যুৱ পৰিষদৰ তিনিগৰাকী সদস্য। সোণাৰীপট্টিত মা-লখিমী জুৱেলাৰ্চত ১০ হেজাৰ টকা দাবী কৰাৰ অভিযোগত সংগঠনটোৰ অভিনাশ দাস, ৰোহন দাস আৰু বিশ্বজিৎ দাস নামৰ যুৱক কেইজনক গ্ৰেপ্তাৰ কৰে ডিব্ৰুগড় আৰক্ষীয়ে।

জাতীয় সংগঠনৰ তিনিওগৰাকী সদস্যকে ডিব্ৰুগড় সদৰ থানাত ১৯৯৬/২০ নম্বৰ গোচৰৰ ভিত্তিত ভাৰতীয় দণ্ডবিধি আইনৰ ৪৪৮,৩৮৪,৩৪ ধাৰাৰ অধীনত কাৰাগাৰলৈ প্ৰেৰণ কৰে।
জিলা অতিৰিক্ত আৰক্ষী অধীক্ষক পদ্মনাভ বৰুৱাই এই সন্দৰ্ভত জনোৱা মতে, প্ৰথমে ১০ হাজাৰ টকা বিচাৰিছিল ব্যৱসায়িক প্ৰতিষ্ঠান খনত। স্বত্বাধিকাৰী জনে সৌজন্যতাৰ খাতিৰত চাৰি হেজাৰ টকা দিছিল যদিও মান্তি হোৱা নাছিল সদস্য কেইজন।

১০ হাজাৰ টকা দিবলৈ অমান্তি হোৱাত সদস্য কেইজনে অভব্য আচৰণো কৰে জুৱেলাৰীখনৰ স্বত্বাধিকাৰীক। ইয়াৰ পিছতে যোৱা ১১ নৱেম্বৰত জুৱেলাৰীখনৰ স্বত্বাধিকাৰীয়ে সদস্য কেইজনৰ বিৰুদ্ধে ডিব্ৰুগড় সদৰ আৰক্ষী চকীত এজাহাৰ দিয়ে। আৰু ইয়াৰ পিছতে শনিবাৰে ডিব্ৰুগড় আৰক্ষীয়ে অভিযুক্ত যুৱক কেইজনক গ্ৰেপ্তাৰ কৰে।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।