Flood Situation in Silchar: শিলচৰত বিধ্বংসী ৰূপত বান, ঘৰৰ প্ৰথম মহলাৰ ওপৰত উঠিছে পানী

অপৰিৱৰ্তিত শিলচৰৰ বান পৰিস্থিতি ৷ বানত ডুব গৈছে চহৰখনৰৰ ন ন ঠাই ৷ নিশাৰ পৰা চহৰখনৰ বিবেকানন্দ ৰোড, তাৰাপুৰ, ইএন্ডি কলনীসহ ৰামনগৰ অঞ্চলত ডুব গৈছে পানীত (Flood Situation in Silchar)৷

চহৰখনৰ পাবলিক স্কুল ৰোড, সোণাই ৰোড, ৰাধামাধৱ ৰোড, পদ্ম নগৰ, ৰাঙ্গিৰখাড়িৰ অৱস্থা এতিয়াও ভয়াবহ ৷ ঘৰৰ প্ৰথম মহলাৰ ওপৰত উঠিছে পানী ৷ অট্টালিকাসমূহত এতিয়াও বন্দী হৈ আছে হাজাৰ হাজাৰ লোক৷

এনডিআৰএফ, এছডিআৰএফ, চিআৰপিএফ, বিএছএফসহ ভাৰতীয় সেনাৰ জোৱানসকলে উদ্ধাৰ অভিযান চলাই আছে ৷ কালি নিশালৈকে অভিযান চলাই বহু লোকক উদ্ধাৰ কৰা হৈছে ৷

আজি পুনৰ উদ্ধাৰকাৰ্য চলাই অভিযানকাৰী দলে ৷ ইপিনে খোৱাপানীসহ খাদ্য সামগ্ৰী বিচাৰি হাহাকাৰ লাগিছে আৱদ্ধসকলৰ মাজত ৷ অনাহাৰে দুদিন ধৰি চহৰত বন্দী হৈ আছে হাজাৰ হাজাৰ লোক l

উল্লেখ্য,  শিলচৰৰ কাষৰীয়া বৰাক নদীয়ে ২০ জুনৰ নিশা ১ বজাত ১৯.৮৩ মিটাৰ বিপদসীমাৰ ওপৰেৰে ২১.৫৯ মিটাৰ উচ্চতম শিখৰত উপনীত হৈছিল আৰু ২২ জুনত দুপৰীয়া ২১.৫০ মিটাৰ উচ্চতাত বৈ আছে। ৪৯ ঘণ্টাত ই মাত্ৰ ৯ চেমি হ্ৰাস পাইছে। আজি ৰাতিপুৱা শিলচৰৰ ইটখোলা মছজিদৰ ওচৰৰ স্বামীজী ৰোডৰ ওচৰত পানীত ডুব যোৱা এটা মৃতদেহ উদ্ধাৰ কৰা হয়।