‘Off the record'ত বিশ্বাস নকৰা বিৰল নেতা তৰুণ গগৈ আছিল সাংবাদিকৰ কাৰণে বাতৰিৰ কাৰখানা

১৯৭১ চনৰ পৰা ২০০১ চনলৈ (মাজত ২বছৰ বাদ দি) সুদীৰ্ঘ ৩০ বছৰ কাল দিল্লী আছিল প্ৰাক্তন মুখ্যমন্ত্ৰী তৰুণ গগৈৰ কৰ্মভূমি। তেওঁৰ চকুৰ সন্মুখতে ইন্দিৰা গান্ধীৰ পৰা অটল বিহাৰী বাজপেয়ীলৈ ১০জন নেতাই প্ৰধান মন্ত্ৰীৰ শপত লৈছিল। দেৱকান্ত বৰুৱা, ফকৰুদ্দিন আলী আহমেদ আদিৰ সান্নিধ্যত ৰাজনৈতিকভাৱে পৰিপক্ক হোৱা গগৈ যদিও নেহৰু-গান্ধী পৰিয়ালৰ আনুগত্য আছিল; আন দলৰ নেতাৰেও তেওঁৰ সু-সম্পৰ্ক গঢ়ি উঠিছিল।

২০০১ চনত তেওঁ অসমৰ মুখ্যমন্ত্ৰীৰ দায়িত্ব গ্ৰহণ কৰাৰ পিছতো দিল্লীৰ মোহ এৰিব পৰা নাছিল। মুখ্যমন্ত্ৰী হৈ থকাৰ কালছোৱাত তেওঁ সঘনাই দিল্লীলৈ আহিছিল। আৰু সংবাদ মেল সম্বোধন নকৰাকৈ কেতিয়াও তেওঁ উভতি যোৱা নাছিল। অসমৰ সংবাদ মাধ্যমৰ দিল্লীস্থিত সাংবাদিক সকলৰ সদ্যপ্ৰয়াত গগৈৰে সৈতে আছে অলেখ অভিজ্ঞতা।

আছাম ট্ৰিবিউনৰ দিল্লীৰ জ্যেষ্ঠ সাংবাদিক কল্যাণ বৰুৱাই তৰুণ গগৈক স্মৰণ কৰি কয় – দিল্লী আছিল তেওঁৰ দ্বিতীয়খন ঘৰ। সুদীৰ্ঘ ৩০ বছৰ কাল দিল্লীত থাকি তেওঁৰ সকলো দলৰ ৰাষ্ট্ৰীয় পৰ্যায়ৰ নেতাৰে মধুৰ সম্পৰ্ক গঢ়ি উঠিছিল। সেয়ে অসমত কংগ্ৰেছৰ চৰকাৰ চলাই থাকোতেও তেওঁ কেন্দ্ৰত থকা বিজেপি চৰকাৰৰ পৰা অনায়াসে অনুদান লৈ যাব পাৰিছিল।

সাময়িক প্ৰসংগৰ জ্যেষ্ঠ সাংবাদিক মধুসূদন শিকদাৰেও ৰোমন্থন কৰে গগৈৰ বৰ্ণিল ৰাজনৈতিক পৰিক্ৰমা। তেওঁ কয় - এজন সাংঘাতিক আড্ডাবাজ ব্যক্তি আছিল গগৈ। সাংবাদিকৰে কথোপকথনত কেতিয়াও তেওঁ protocolৰ মেৰপেঁচত বান্ধ খাই থকা নাছিল। তেওঁ অতি সুন্দৰকৈ বঙালী ক’ব পাৰিছিল বুলিও দাবী কৰে শিকদাৰে। তেওঁ লগতে কয় - তেওঁৰ ব্যক্তিগত জীৱনৰ ৰসাল ঘটনাবোৰো বিনা সংকোচেৰে কৈ গৈছিল। বিশ্বাসযোগ্যতা আৰু মৰ্যাদা বজাই ৰাখি সাংবাদিকসকলে তাৰে প্ৰাসংগিক অংশহে প্ৰকাশ কৰিছিল।

উল্লেখযোগ্য যে দিল্লীলৈ সদায় তেওঁ যাত্ৰীবাহী বিমানতে উৰা মাৰিছিল। বিমানত উঠিয়েই তেওঁ স্বভাৱসুলভ হাঁহিৰে আন যাত্ৰীসকলক সম্বোধন জনাইছিল। যাত্ৰীসকলৰ লগত কথা বতৰাত মচগুল হৈ ২-৩ ঘণ্টাৰ বাট পাৰ কৰিছিল। কেতিয়াবাহে এৰাব নোৱাৰা পৰিস্থিতিত পৰিলে তেওঁ Chartered বিমানৰ সেৱা গ্ৰহণ কৰিছিল। দেখা যায় সাধাৰণ ৰাইজৰে মত বিনিময় কৰাৰ কোনো সুযোগ তেওঁ এৰি দিয়া নাছিল।

নিয়মীয়া বার্তাৰ দিল্লীৰ জ্যেষ্ঠ সাংবাদিকক কল্লোল ভৌমিকে তৰুণ গগৈক এজন সঁচা অৰ্থত গণতন্ত্ৰত বিশ্বাসী নেতা হিচাপে অভিহিত কৰিছে। ভৌমিকে কয় – প্ৰতিবাদৰ ভাষাক তেওঁ কাহানিও আওকাণ কৰা নাছিল। প্ৰতিবাদী সংগঠনৰে সদায় তেওঁ কথা বতৰা পতাত জোৰ দিছিল। তেনে ধৰণে তেওঁ অসমৰ বহু মৌলিক সমস্যাৰ সমাধানৰ পথ প্ৰশস্ত কৰিব পাৰিছিল।

প্ৰতিদিন টাইমৰ দিল্লীস্থিত সাংবাদিক প্ৰাঞ্জল দাসে কয় - ‘Off the record'ত বিশ্বাস নকৰা বিৰল নেতা তৰুণ গগৈ আছিল সাংবাদিকৰ কাৰণে বাতৰিৰ কাৰখানা। তেওঁ কেতিয়াও সাংবাদিকৰ শ্ৰেণী বিভাজন কৰা নাছিল। এজন internয়ে তেওঁৰ সাক্ষাৎকাৰ গ্ৰহণ কৰিব পাৰিছিল। দাসে লগতে কয় – দিল্লীৰ সাংবাদিকসকলৰে তেওঁৰ সম্পৰ্ক যথেষ্ট professional আছিল যদিও কিন্তু আন্তৰিকতা পূৰ্ণ আছিল। তেওঁৰ ৰাজহুৱা জীৱন অতি স্বচ্ছ আছিল।

সদ্যপ্ৰয়াত অসমৰ প্ৰাক্তন মুখ্যমন্ত্ৰী তৰুণ গগৈয়ে সঘনাই দিল্লীলৈ আহিছিল আৰু দিল্লীৰ অসম ভৱনত সংবাদ মেল সম্বোধন কৰিছিল। তেওঁৰ কাৰণেই অসমৰ সংবাদ মাধ্যমৰ মাজত দিল্লীয়ে অধিক গুৰুত্ব লাভ কৰিছিল বুলি ক’ব খোজে বহু সাংবাদিকে। কিন্তু তেওঁৰ দিল্লী মুখী চিন্তাধাৰাৰ কাৰণে অসমৰ শাসনৰ remote control দিছপুৰৰ পৰা দিল্লী পালেহি বুলি বহু জনে সমালোচনা কৰে।

কেৱল সাংবাদিকেই নহয় তেওঁ স্বভাৱসুলভ হাঁহিটো আৰু বাক্যবাণবোৰে ৰাজনৈতিক কার্টুনিষ্ট, কৌতুক অভিনেতা আদিকো সমল দিছিল। ৮০০ কোটি টকাৰ ঘাটি বাজেটৰ এখন ৰাজ্যৰ মুখ্যমন্ত্ৰী হৈ ৮ বছৰত ৰাহি বাজেটৰ পৰ্যায়লৈ লৈ যোৱা এনে নেতা ইতিহাসত বিৰল।