বিজেপিয়ে দিব দৈনিক ২৬ লিটাৰ গাখীৰ! বিজেপিৰ সভাপতি ভৱেশ কলিতা আৰু UPPLৰ মুৰব্বী প্ৰমোদ বড়োলৈ উন্নতমানৰ ঘাঁহ পঠিয়ালে দেৱব্ৰত শইকীয়াই

ৰাজ্যৰ ৰাজনীতিত কোন দলে গাখীৰ দিয়ে? দানা খোৱালেও বিৰোধী দলে গাখীৰ দিব নোৱাৰে বুলি উপ নিৰ্বাচনৰ প্ৰচাৰ সভাত মুখ্যমন্ত্ৰী ড° হিমন্ত বিশ্ব শৰ্মাই সদৰি কৰিছিল ৷ ইয়াৰ পিছতে উপ নিৰ্বাচনৰ আগদিনা বিৰোধী দলপতি দেৱব্ৰত শইকীয়াই BJPৰ সভাপতি ভৱেশ কলিতা আৰু UPPLৰ সভাপতি প্ৰমোদ বড়োলৈ প্ৰেৰণ কৰিলে চাৰি কেজিকৈ উন্নত প্ৰজাতিৰ ঘাঁহৰ বীজ ৷ যি ঘাঁহ খাই বেছিকৈ গাখীৰ দিব পাৰিব BJP আৰু UPPLয়ে বুলি দাবী কৰিলে বিৰোধী দলপতি দেৱব্ৰত শইকীয়াই ৷

উল্লেখ্য যে, মুখ্যমন্ত্ৰী ড° শৰ্মাই কৈছিল- “গাখীৰ দিয়া গৰুক দানা খোৱাবনে গাখীৰ নোখোৱা গৰুক দানা খোৱাব? কংগ্ৰেছ আৰু AIUDFৰ গৰুক দানা খোৱালেও গাখীৰ নিদিয়ে ৷ কিন্তু আমাৰ BJPৰ গৰুৱে দৈনিক ২৬ লিটাৰকৈ গাখীৰ দিয়ে ৷”

পাঁচ সমষ্টিৰ উপ নিৰ্বাচনত বহুকেইটা খুহুতীয়া বাক্য বাণেৰে বিৰোধীক কটাক্ষ কৰিছিল মুখ্যমন্ত্ৰী ড° হিমন্ত বিশ্ব শৰ্মাই ৷ ইয়াৰ ভিতৰত অন্যতম হ'ল- গাখীৰ কোন দলৰ গৰুৱে কিমান দিয়ে?

মুখ্যমন্ত্ৰী ড° হিমন্ত বিশ্ব শৰ্মাৰ এই গাখীৰৰ ৰাজনীতি কৰাৰ পিছত শুকুৰবাৰে বিৰোধী দলপতি দেৱব্ৰত শইকীয়াই গাখীৰৰ বাবে ঘাঁহ প্ৰেৰণ কৰিলে শাসকীয় BJP-UPPLলৈ ৷ দেৱব্ৰত শইকীয়াই ক'লে- “BJPৰ সভাপতি ভৱেশ কলিতালৈ চাৰি কেজি ওজনৰ ঘাঁহৰ বীজ আৰু UPPLৰ সভাপতি প্ৰমোদ বড়োলৈও চাৰি কেজি ওজনৰ ঘাঁহৰ বীজ পঠিয়ালো আজি৷”

শাসকীয় BJP-UPPLৰ সভাপতি লৈ চাৰি কেজিকৈ উন্নত প্ৰজাতিৰ বীজ আমাজ'নৰ পৰা ক্ৰয় কৰি পঠিয়াই বিৰোধী দলপতি দেৱব্ৰত শইকীয়াই ক'লে- “ঘাঁহ খাই বেছিকৈ গাখীৰ দিয়ক ৷ নিজে খাই ৰৈ যোৱা গাখীৰ দিয়ক ৰাইজক ৷ BJP চৰকাৰে ৰাইজক পাঁচ কেজিকৈ বিনামূলীয়া চাউল দিছে ৷ এতিয়া উৎপাদিত গাখীৰ ৰাইজক বিলাই দিয়ক আৰু ৰাইজে বিনামূলীয়া চাউলৰে BJPয়ে দিয়া গাখীৰৰ সৈতে পায়স বনাই খাওক ৷”

এয়াই হ'ল উপ-নিৰ্বাচন কেন্দ্ৰিক ৰাজনীতিত মুখ্যমন্ত্ৰীয়ে দিয়া গাখীৰৰ নতুন মাত্ৰা আৰু শেষত বিৰোধী দলপতিয়ে যোগান ধৰা উন্নত প্ৰজাতিৰ ঘাঁহৰ বীজ ৷