স্বাধীনতাৰ পূৰ্বে বাছ চলাচল কৰা গোৱালপাৰাৰ এটা পথ, এতিয়া চলাচল কৰিব নোৱাৰে এখন চাইকেলো

গোৱালপাৰা জিলাৰ পূব সমষ্টিৰ অন্তৰ্গত বহতি-শালমাৰা গড়কাপ্তানী পথৰ হাবুৰি নদীৰ ওপৰত থকা এখন জৰাজীর্ণ দলং। এই মৰণফান্দৰূপী দলংখনৰ ওপৰেৰে গাড়ীতো বাদেই দিয়ক, চাইকেল এখনেৰেও পাৰ হোৱা কঠিন হৈ পৰিছে। প্ৰায় ডেৰ বছৰ পূৰ্বে গোৱালপাৰা পূব সমষ্টিৰ বিধায়ক এ কে ৰছিদ আলমে পকী দলঙৰ আধাৰশিলা স্থাপন কৰিছিল। আধাৰশিলা ভাঙি গ’ল কিন্তু আৰম্ভ নহ’ল দলং নিৰ্মাণৰ কাম।

বৃহত্তৰ বহতি-শালমাৰা অঞ্চলৰ যাতায়াতৰ একমাত্র পথৰ ওপৰত থকা দলংখনৰ জৰাজীর্ণ অৱস্থাৰ বাবেই যাতায়াতৰ ক্ষেত্রত ৰাইজে যমৰ-যাতনা ভুগিবলগীয়া হৈছে। স্বাধীনতাৰ পূৰ্বৰে পৰা এই পথেৰে বহতিৰ পৰা ৰাজ্যৰ বিভিন্ন প্রান্তলৈ যাত্রীবাহী বিভিন্ন যান-বাহন চলাচল কৰিছিল। কিন্তু কাঠৰ দলংখনৰ এটা অংশ বহি যোৱাত বিগত পাঁচ বছৰ ধৰি কোনোধৰণৰ যান-বাহন চলাচল কৰিব নোৱাৰে l ফলত বহিঃৰাজ্যৰ লগত সংযোগ বিচ্ছিন্ন হৈ পৰিছে অঞ্চলবাসীৰ।

বহতি গাঁৱৰ উত্তৰ প্ৰান্তত থকা জলজলী নদীৰে ভাৰত ত্যাগ আন্দোলনৰ সময়ত জাতিৰ পিতা মহাত্মা গান্ধীয়ে হাত জোকাৰি সম্বোধন কৰিছিল। এনে ঐতিহ্যমণ্ডিত ঠাইখনক চৰকাৰে অৱহেলা কৰাত ক্ষোভিত হৈ পৰিছে ৰাইজ।