যোৰহাটত পোৱা গ’ল নেকি কোৰোণাৰ নতুন ষ্ট্ৰেইন? কি ক’লে জিলা উপায়ুক্তই?

নৱবৰ্ষৰ প্ৰথম দিনটোতে যোৰহাটবাসীলৈ আছে এটা ভাল খবৰ। এই খবৰে যোৰহাটবাসীৰ দুঃ চিন্তা হ্ৰাস কৰিব। কিছুদিন পূৰ্বে লণ্ডনৰ পৰা আহি কোভিড19ত আক্ৰান্ত হোৱা যোৰহাটৰ আস্ফাকুৰ ৰহমান নামৰ লোকজনৰ শৰীৰত পোৱা নগ’ল কভিড19ৰ নতুন ষ্ট্ৰেইন।

যোৱা ১৩ ডিচেম্বৰত লণ্ডনৰ পৰা আহি দিল্লীহৈ যোৰহাটত উপস্থিত হৈছিল আস্ফাকুৰ ৰহমান। ২৪ ডিচেম্বৰত নগৰৰ সমীপৰ ৰজাবাৰীৰ বাসিন্দা আস্ফাকুৰৰ শৰীৰত পোৱা গৈছিল কোভিড19ৰ সংক্ৰমণ।

তেওঁৰ ঘৰত কাম কৰা টুটুমণি নামৰ এগৰাকী মহিলাৰ শৰীৰতো পোৱা গৈছিল কোভিড19ৰ সংক্ৰমণ। যোৱা ১২ ডিচেম্বৰত লণ্ডনৰ পৰা আহি দিল্লীত উপস্থিত হোৱাৰ পিছত অৱশ্যে লোকজনৰ শৰীৰত কোভিড19 নিগেটিভ পোৱা গৈছিল।

যোৰহাটত ২৪ ডিচেম্বৰত পুনৰ পৰীক্ষা কৰাত কোভিড19 পজিটিভ পোৱাৰ পিছত আস্ফাকুৰ আৰু তেওঁৰ ঘৰত কাম কৰা যুৱতীগৰাকীক JMCHৰ আছুতীয়া কক্ষত ভৰ্তি কৰোৱা হৈছিল। লগতে তেওঁলোকৰ সংস্পৰ্শলৈ অহা লোকসকলকো চিনাক্ত কৰি আছুতীয়াকৈ ৰখাৰ ব্যৱস্থা কৰা হৈছিল। ইয়াৰ পিছতে এই ভাইৰাছৰ ষ্ট্ৰেইন পৰীক্ষা কৰাৰ বাবে পুণাস্থিত এন আই ভিলৈ নমুনা প্ৰেৰণ কৰা হৈছিল। কিন্তু পৰীক্ষাৰ ফলাফলে দূৰ কৰিলে শংকা। আস্ফাকুৰৰ শৰীৰত পোৱা নগ’ল কৰোণা ভাইৰাছৰ নতুন ষ্ট্ৰেইন। এই কথা জানিবলৈ দিছে যোৰহাটৰ উপায়ুক্তই ।