সাৱধান হওক! ফেব্ৰুৱাৰীত অসমত ভয়ানকভাৱে বৃদ্ধি পাইছে কোভিড আক্রান্তৰ সংখ্যা

কোৰোণা মহামাৰীৰ আতংক এতিয়াও শেষ হোৱা নাই। শেহতীয়াকৈ অসমত কোৰোণা ভাইৰাছে ভয়ংকৰ ৰূপ ধাৰণ কৰিছে। দেওবাৰে ৰাজ্যৰ ৯জন লোক নতুনকৈ আক্ৰান্ত হৈছে কোৰোণাত৷ মহাৰাষ্ট্ৰ, কেৰালা আদি ৰাজ্যৰ তুলনাত কোৰোণা সংক্ৰমণ কিছু পৰিমাণে হ্ৰাস পাইছে যদিও চলিত বৰ্ষৰ জানুৱাৰী মাহৰ পৰা ক্ৰমাৎ বৃদ্ধি পাইছে কোৰোণাত আক্ৰান্ত সংখ্যা৷

ফেব্ৰুৱাৰী মাহৰ ১৫ তাৰিখে ১১জন লোক কোৰোণাত আক্ৰান্ত হোৱাৰ বিপৰীতে ১৭ তাৰিখে ২১জন, ১৮ তাৰিখে ১৯জন, ২০ তাৰিখে ১৬জন আৰু ২১ ফেব্ৰুৱাৰী দেওবাৰে ৯ জনকৈ লোক কোৰোণাত আক্ৰান্ত হোৱা খবৰ জানিবলৈ দিলে ৰাজ্য চৰকাৰৰ স্বাস্থ্য সচিবগৰাকীয়ে ৷

সোমবাৰে এক সংবাদমেলত স্বাস্থ্য সচিবগৰাকীয়ে জানিবলৈ দিয়া মতে, সমগ্ৰ দেশত বৰ্তমানলৈকে ১ কোটি ৯ লাখ ৯১ হাজাৰ লোক কোৰোণাত আক্ৰান্ত হৈছে ৷ অসমত এই সংখ্যা ২ লাখলৈ বৃদ্ধি হৈছে৷ কোৰোণাৰ এই ভয়াৱহতাৰ প্ৰতি লক্ষ্য ৰাখি স্বাস্থ্য বিভাগৰ আহ্বান – সজাগ–সচেতন হওক আৰু কোভিডৰ সকলো নীতি–নিয়ম মানি চলক৷

কোৰোণা মহামাৰীৰ সময়ত সন্মুখত থাকি সেৱা আগবঢ়োৱা স্বাস্থ্য কৰ্মী, নাৰ্ছ, অংগনৱাড়ী কৰ্মী, পঞ্চায়ত কৰ্মীসকলক ভেকচিন প্ৰদান কৰি থকা হৈছে৷ আৰু ফেব্ৰুৱাৰী মাহৰ শেষত এই প্ৰক্ৰিয়া শেষ হোৱাৰ পিছত মাৰ্চ মাহৰ প্ৰথম সপ্তাহৰ পৰা পঞ্চাশ বছৰ বয়সৰ লোক সকলক ভেকচিন প্ৰদান কৰাৰ ব্যৱস্থা কৰা হ’ব, যিহেতু কোৰোণাত পঞ্চাশ বছৰৰ ঊৰ্ধ্বৰ লোক সহজে আক্ৰান্ত হোৱাৰ লগতে মৃত্যুৰ আশংকা থাকে৷ সেয়ে এইসকল লোকক শীঘ্ৰে ভেকচিন প্ৰদানৰ ব্যৱস্থা কৰা হ’ব৷

সচিবগৰাকীয়ে জনোৱা মতে, প্ৰতিষেধক ল’বলৈ ভয় কৰিবলগীয়া একো নাই, ই আপোনাক সুৰক্ষিতহে কৰিব৷ সেয়ে এই ভেকচিন ল’বলৈ আহ্বান সকলোকে৷ সকলো স্বাস্থ্য বিভাগৰ কাৰ্যালয়ত এই ব্যৱস্থা কৰা হ’ব৷ বৰ্তমান ৰাজ্যৰ ৰে’লৱে এয়াৰপ’ৰ্ট আদিত যাতায়াতৰ সময়ত সকলো টেষ্টৰ প্ৰক্ৰিয়া অব্যাহত আছে।