‘এআইইউডিএফ আৰু আন মিত্ৰ দলৰ কৰ্মীসকলক বৰ ককাইৰ দৰে আঁকোৱালি ল’লেহে বিজেপিক প্ৰতিহত কৰিব পাৰিম’

বিধানসভা নিৰ্বাচনৰ দিন চমু চাপি অহাৰ লগে লগে তৎপৰতা বৃদ্ধি পাব ধৰিছে ৰাজনৈতিক দলসমূহৰ। বৃহস্পতিবাৰে বটদ্ৰৱা সমষ্টিৰ অন্তৰ্গত দলংঘাট আৰু বটদ্ৰৱা ব্লক কংগ্ৰেছ কমিটীৰ উদ্যোগত জাজৰিৰ শিমলুতলত অনুষ্ঠিত হয় ক‌ংগ্ৰেছৰ এখন কৰ্মী সভা। কৰ্মী সভাখনত নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছৰ তত্বাৱধয়াক অনিৰুদ্ধ সিং  উপস্থিত হৈ সমাগত বিধানসভা নিৰ্বাচনৰ সন্দৰ্ভত দলৰ নেতা-কৰ্মী সকলৰ লগত মত বিনিময় কৰাৰ লগতে আগন্তুক নিৰ্বাচনৰ ৰণকৌশল সন্দৰ্ভত আলোচনা কৰে।

দলংঘাট আৰু বটদ্ৰৱা ব্লক কংগ্ৰেছ কমিটীৰ অন্তৰ্গত সকলো মণ্ডল কংগ্ৰেছৰ বিষয়ববীয়াৰ উপস্থিতিত আয়োজিত সভাখনত ৰাষ্ট্ৰীয় সাধাৰণ সম্পাদকজনে দলৰ কৰ্মীসকলক সম্বোধি কয় যে, মহাজোঁট বন্ধনৰ পিছত এতিয়া আমি এআইইউডিএফ আৰু আন আন মিত্ৰ দলৰ কৰ্মীসকলক বৰ ককাইৰ দৰে আঁকোৱালি ল’লেহে বিজেপিক প্ৰতিহত কৰিব পাৰিম৷

এই সভাত নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছৰ তত্বাৱধায়ক অনিৰুদ্ধ সিঙৰ লগতে নগাঁও জিলা কংগ্ৰেছৰ সভাপতি তপন শৰ্মা, অসম প্ৰদেশ কংগ্ৰেছৰ সম্পাদিকা শিবামণি বৰা, প্ৰাক্তন মন্ত্ৰী গৌতম বৰাসহ কংগ্ৰেছৰ বিভিন্ন পৰ্যায়ৰ নেতা-কৰ্মীসকল উপস্থিত থাকে।

সভাৰ অন্তত সাংবাদিকৰ আগত ৰাষ্ট্ৰীয় সাধাৰণ সম্পাদক গৰাকীয়ে  আগন্তুক নিৰ্বাচনত বটদ্ৰৱা সমষ্টিটো কংগ্ৰেছ দলে দখল কৰিব বুলি দাবী কৰে৷ সাংবাদিকৰ প্ৰশ্নৰ উত্তৰত তেওঁ লগতে কয় যে এআইইউডিএফৰ লগত হোৱা মিত্ৰতাই কংগ্ৰেছ দলৰ একো ক্ষতি নকৰে৷ আমি হাতখন আগবঢ়াই দিছো তেওঁলোকে আকোঁৱালি লৈছে৷ সেয়ে এইবাৰ আমাৰ জয় নিশ্চিত। বিজেপি দলক এইবাৰ আমি ওফৰাবলৈ সক্ষম হম। মহাজোট বন্ধনে আমাক অধিক শক্তিশালী কৰি তুলিব। লগতে কংগ্ৰেছৰ তত্বাবধায়কগৰাকীয়ে কয় যে বটদ্ৰৱা সমষ্টিত কংগ্ৰেছ আৰু এআইইউডিএফৰ মাজত বুজাবুজিৰ মাজেৰে প্ৰাৰ্থিত্ব প্ৰদান কৰা হ’ব।