ভূপেন বৰাৰ গান-কবিতা! ভূপেন বৰাক বিষ্ণু ৰাভা, ভূপেন হাজৰিকাৰে তুলনা কৰিলে কংগ্ৰেছী বিধায়ক আব্দুৰ ৰছিদ মণ্ডলে

কবিতা আৰু গানেৰে শাসকীয় BJP নেতৃত্বাধীন চৰকাৰক সমালোচনা কৰা প্ৰদেশ কংগ্ৰেছৰ সভাপতি ভূপেন বৰাকলৈ এতিয়া সৰৱ শাসকীয় বিজেপি ৷ দলটোৰ প্ৰায় সংখ্যক মন্ত্ৰী-বিধায়কে উভতি ধৰিছে ভূপেন বৰাক ৷ কিন্তু ভূপেন বৰাৰ পক্ষত ঠিয় হৈ কংগ্ৰেছৰ একাংশ বিধায়কেও আক্ৰমণ কৰিছে শাসকীয় BJPক ৷

BJP নেতৃত্বাধীন ড° হিমন্ত বিশ্ব শৰ্মাৰ চৰকাৰক গান আৰু কবিতা লিখি সমালোচনা কৰা আৰম্ভ কৰিছে ভূপেন বৰাই ৷ আনকি ভূপেন বৰাই নিজৰ গানটো জুবিন গাৰ্গক গাবলৈও জনালে আহ্বান ৷ ইয়াৰ পিছতে শুকুৰবাৰে ভূপেন বৰাক উভতি ধৰিলে মুখ্যমন্ত্ৰীৰ ৰাজনৈতিক সচিব তথা বিধায়ক জয়ন্ত মল্ল বৰুৱাই ৷ বৰুৱাই ক'লে- “চেনেলৰ কমেডী শ্বৰ হ'ষ্টৰ দায়িত্ব লওক ভূপেন বৰাই ৷ এতিয়া ভূপেন বৰাই জুবিন গাৰ্গকো বদনামী কৰিব ৷”

শাসকীয় পক্ষৰ পৰা এনেধৰণৰ আক্ৰমণ পাই বহি নাথাকিল বিৰোধী কংগ্ৰেছৰ বিধায়ক আব্দুৰ ৰছিদ মণ্ডল ৷ দলীয় সভাপতিৰ হৈ ঠিয় হৈ মণ্ডলে ক'লে- “অম্বিকাগিৰি ৰায় চৌধুৰী, বিষ্ণু ৰাভাৰ কাম ভূপেন বৰাই কৰি আছে ৷  কবিতা, গীতৰ জৰিয়তে মানুহক জগাব বিচাৰিছে তেওঁ ৷ বিষ্ণু ৰাভাই যেনেদৰে গীতৰ দ্বাৰা মানুহক জগাইছিল, তেনেদৰে ভূপেন বৰাই মানুহক জগাইছে ৷ অম্বিকাগিৰিয়ে কবিতাৰে মানুহক জগোৱাৰ দৰে ভূপেন বৰাইও অসমীয়া সত্তাক জগাইছে ৷ শিল্পী বিখ্যাতো হ'ব পাৰে অখ্যাতো হ'ব পাৰে ৷  ৰাজনীতিত কবিতা, গান, নাট, প্ৰৱন্ধৰ প্ৰয়োজন আছে ৷ ভূপেন বৰাই অসমবাসীক জগাবলৈ অম্বিকাগিৰি, বিষ্ণু ৰাভা, ভূপেন হাজৰিকাৰ পথ লৈছে ৷”

বহি নাথাকিল প্ৰদেশ কংগ্ৰেছৰ কাৰ্যকৰী সভাপতি তথা সৰুক্ষেত্ৰীৰ বিধায়ক জাকিৰ হুছেইন শিকদাৰ ৷ জাকিৰে ক'লে- “গান আৰু কবিতা সকলোয়ে লিখিব নোৱাৰে ৷ ভূপেন বৰাই গান আৰু কবিতা লিখি চৰকাৰক সজাগ কৰিছে ৷”

এতিয়া এনেদৰেই ভূপেন বৰাৰ গান আৰু কবিতাক লৈ সৰৱ চৰ্চা চলিছে শাসক-বিৰোধীৰ মাজত ৷