এইবাৰ “মিঞা মিউজিয়াম” নহয়, আন এক মিউজিয়ামৰহে দাবী কৰিলে আৰ পি শৰ্মাই৷ কংগ্ৰেছী বিধায়ক শ্বেৰমান আলীৰ “মিঞা মিউজিয়াম”ৰ প্ৰসংগক লৈ ৰাজ্যৰ ৰাজনীতি তোলপাৰ হৈ থকা সময়তে আন এজন কংগ্ৰেছী আৰ পি শৰ্মাই দাবী কৰিলে আন এক মিউজিয়ামৰ।
কংগ্ৰেছ নেতা আৰ পি শৰ্মাই দাবী কৰিলে “আলু-পিঁয়াজ”ৰ মিউজিয়াম নিৰ্মাণৰ৷ আৰ পি শৰ্মাৰ স্পষ্ট মত - ‘অস্বাভাৱিক মূল্যবৃদ্ধিৰ ফলত বহুতে এতিয়া আলু-পিঁয়াজ খাবলৈ বাদ দিছে ৷ এনে অৱস্থাত আলু-পিঁয়াজ এদিন দুস্প্ৰাপ্য সামগ্ৰীলৈ ৰূপান্তৰ হ'ব ৷ সেয়ে ভৱিষ্যত প্ৰজন্মক আলু-পিঁয়াজ কি সেয়া চিনাকী কৰোৱাৰ স্বাৰ্থতে “আলু-পিঁয়াজ”ৰ মিউজিয়াম খোলাৰ দাবী জনালে আৰ পি শৰ্মাই ৷
প্ৰধানমন্ত্ৰী নৰেন্দ্ৰ মোদীৰ লগতে মুখ্যমন্ত্ৰী সৰ্বানন্দ সোণোৱালকো এই ক্ষেত্ৰত গুৰুত্ব প্ৰদানৰ আহ্বান জনাই বিজেপি কাৰ্যালয়ৰ লগতে জিলাই-জিলাই একোটাকৈ আলু-পিঁয়াজৰ মিউজিয়াম খোলাৰ দাবী তোলে কংগ্ৰেছ নেতাগৰাকীয়ে।
আৰ পি শৰ্মাই বৰ্তমানৰ চৰকাৰৰ দিনত পুৰণি বিজেপি কৰ্মীয়ে গুৰুত্ব নোপোৱাৰ অভিযোগ উত্থাপন কৰি তেনে বিজেপি কৰ্মীৰ কংগ্ৰেছলৈ আগমন ঘটিছে আৰু জানুৱাৰী মাহৰ ভিতৰত ৪০-৫০ হাজাৰ পুৰণি বিজেপি কৰ্মীয়ে কংগ্ৰেছত যোগদান কৰিব বুলি উল্লেখ কৰে ৷ লগতে আৰ পি শৰ্মাই বিজেপিৰ এতিয়া কোনো অস্তিত্ব নাই বুলিও উল্লেখ কৰে৷
শনিবাৰে সমগ্ৰ ৰাজ্যৰ লগতে তেজপুৰতো অসম প্ৰদেশ কংগ্ৰেছৰ আহ্বানমৰ্মে জিলা কংগ্ৰেছ কাৰ্যালয়ৰ সন্মুখত অৱস্থান ধৰ্মঘট কাৰ্যসূচীৰে ৰূপায়ন কৰে “কৃষক অধিকাৰ দিৱস”৷
Published by:Himangshu Bhuyan
First published:
অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|