‘কংগ্ৰেছ-AIUDFৰ মিত্ৰতা অসমীয়াৰ বুকুত ডেগাৰৰ আঘাত, উজনিত শূন্য হ’ব কংগ্ৰেছ’

প্ৰায় নিশ্চিত হ’ল কংগ্ৰেছ আৰু AIUDFৰ মিত্ৰতা! শনিবাৰে প্ৰাক্তন মুখ্যমন্ত্ৰী তৰুণ গগৈৰ বাসগৃহত কংগ্ৰেছ আৰু AIUDFৰ মাজত প্ৰায় চূড়ান্ত হ’ল প্ৰাক নিৰ্বাচনী মিত্ৰতা। কংগ্ৰেছ-AIUDFৰ মিত্ৰতাই এতিয়া শংকিত কৰি তুলিছে বিজেপি শিবিৰক। প্ৰতিজন বিজেপি নেতাৰ মতে, এই মিত্ৰতাই ধ্বংস কৰিব অসমীয়া জাতিক।

এই মিত্ৰতাৰ ফলত কংগ্ৰেছ ক্ষতিগ্ৰস্ত হোৱাৰ বিপৰীতে AIUDF লাভান্বিত হ'ব বুলি ভৱিষ্যতবাণী কৰিলে বিজেপিৰ সাংসদ দিলীপ শইকীয়াই ৷ ইফালে ডিব্ৰুগড়ৰ বিজেপি বিধায়ক প্ৰশান্ত ফুকনে AIUDFৰ সৈতে কংগ্ৰেছৰ মিত্ৰতাই উজনি অসমত কংগ্ৰেছক নিঃশেষ কৰি পেলাব বুলি দাবী কৰিছে।



এইবাৰ কংগ্ৰেছ আৰু AIUDFৰ সাম্ভাব্য মিত্ৰতাৰ সন্দৰ্ভত মন্তব্য প্ৰকাশ কৰিছে ৰাজ্যিক মন্ত্ৰী পীয়ুষ হাজৰিকাই। হাজৰিকাৰ মতে, এই মিত্ৰতাই কংগ্ৰেছে অসমীয়াৰ বুকুত ডেগাৰেৰে আঘাত কৰিলে। এই মিত্ৰতাই উজনিত শূন্য কৰি পেলাব কংগ্ৰেছ। মন্ত্ৰীগৰাকীয়ে লগতে কয় যে,  ‘আজিলৈকে অসমীয়া জাতিক ধ্বংস কৰিবলৈ কংগ্ৰেছে যি যি কাম কৰিলে, তাৰে ভিতৰত AIUDFৰ সৈতে হোৱা মিত্ৰতা হ’ল সকলোতকৈ ক্ষতিকাৰক। গতিকে বিজেপিয়ে এয়া কেতিয়াও হ’বলৈ নিদিয়ে। অসমীয়া জাতি ধ্বংস কৰিব পৰাকৈ বদৰুদ্দিন আজমলক কেতিয়াও কিং মেকাৰ হ’বলৈ নিদিয়ে বিজেপিয়ে। অসমত আকৌ বিজেপিৰে চৰকাৰ হ’ব।’



ইফালে মিত্ৰতাৰ প্ৰসংগত প্ৰদেশ কংগ্ৰেছৰ সভাপতি ৰিপুণ বৰাই কয় যে, ‘যদি আমি ভুল সিদ্ধান্ত লৈছো, তেন্তে আমাৰ ক্ষতি হ’ব। AIUDFৰ সৈতে আমাৰ মিত্ৰতা এতিয়াও চূড়ান্ত হোৱা নাই। মাত্ৰ কথা বতৰা চলিছে।’ ৰিপুণ বৰাৰ মতে, কেৱল AIUDFৰ লগতে নহয়, কংগ্ৰেছে মহাজোঁট বন্ধনৰ কথা কৈছে। সকলো জাতি-জনগোষ্ঠীক লৈ আগবাঢ়িব কংগ্ৰেছ।’