“AIUDFৰে মিত্ৰতাৰ চূড়ান্ত সিদ্ধান্ত ল'ব দলৰ পলিটিকেল এফেয়াৰ্ছ কমিটিয়ে”— বিৰোধী দলপতি দেৱব্ৰত শইকীয়া

হাইকমাণ্ডে জৰুৰীভাৱে ভূপেন বৰাক দিল্লীলৈ তলৱ কৰি নিয়াৰ পিছৰে পৰা পুনৰ চৰ্চা চলিছে কংগ্ৰেছ-AIUDFৰ মিত্ৰতাৰ বিষয়টোয়ে ৷ ভূপেন বৰাই বিষয়টো নস্যাৎ কৰিছে যদিও সোমবাৰে AIUDFৰে মিত্ৰতাৰ চূড়ান্ত সিদ্ধান্ত দলৰ Political Affairs Committeeয়েহে ল’ব বুলি আন এক বিশেষ ইংগিত দিলে বিৰোধী দলপতি দেৱব্ৰত শইকীয়াই ৷ ইয়াৰ বিপৰীতে মিত্ৰতা নকৰিলে কংগ্ৰেছে আগন্তুক লোকসভাৰ নিৰ্বাচনত এখনো আসন নাপায় বুলি পুনৰ ভৱিষ্যৎবাণী কৰিলে AIUDFয়ে ৷

“ক’ত হ’ব মিত্ৰতা? কেনেকৈ হ’ব মিত্ৰতা?” — কংগ্ৰেছ আৰু AIUDFৰ নাম ল’লেই সততে উচ্চাৰণ হয় মিত্ৰতাৰ প্ৰসংগটো । কংগ্ৰেছে নিবিচাৰে ৷ মানে প্ৰদেশ কংগ্ৰেছৰ সভাপতি ভূপেন বৰাই নিবিচাৰে ৷ ইয়াৰ বিপৰীতে দিছপুৰৰ ৰাজনৈতিক মুনফা লুটি ভাল পোৱা AIUDFয়ে যিকোনো মূল্যৰ বিনিময়ত বিচাৰে কংগ্ৰেছৰ সৈতে মিত্ৰতা ৷ এই মিত্ৰতাৰ প্ৰসংগই সততে জোকাৰি থাকে দিছপুৰৰ ৰাজনীতি ৷

বিগত সপ্তাহত কংগ্ৰেছ হাইকমাণ্ডে প্ৰদেশ কংগ্ৰেছৰ সভাপতি ভূপেন বৰাক জৰুৰীভাবে তলব কৰি নিছিল দিল্লীলৈ । চৰ্চা হ’ল— AIUDFৰে মিত্ৰতা কৰাৰ বিষয়ত আলোচনা হ’ল । কিন্তু এই বিষয়ত কোনো আলোচনাই হোৱা নাই বুলি দাবী কৰিলে ভূপেন বৰাই ৷ এই বিষয়ত দুয়োটা বিৰোধী দলৰ মাজত চলিল তৰ্কাতৰ্কি ৷

ইয়াৰ মাজতে সোমবাৰে AIUDFৰে মিত্ৰতাক লৈ আন এক বিশেষ ইংগিত দি দিলে খোদ বিৰোধী দলপতি দেৱব্ৰত শইকীয়াই । দেৱব্ৰত শইকীয়াই ক’লে— “মিত্ৰতাৰ বিষয়ত হাইকমাণ্ডে গঠন কৰি দিয়া Political Affairs Committee য়েহে চূড়ান্ত সিদ্ধান্ত ল’ব ৷”

দেৱব্ৰত শইকীয়াৰ এই কথাই কিহৰ ইংগিত দিছে— নিশ্চয় বুজাই বুজিব ৷ লগতে শইকীয়াই ক’লে— “AIUDFৰ সৈতে মিত্ৰতাৰ কথা কোনো ৰাজহুৱা প্লেটফৰ্মত দলৰ তিনি সাংসদে কোৱা মই দেখা নাই ৷”

ইপিনে পুৰণি কথাকেই সোমবাৰে পুনৰ দোহাৰিলে AIUDFৰ ধিং সমষ্টিৰ বিধায়ক আমিনুল ইছলামে ৷ আমিনুলে ক’লে— “মিত্ৰতা নকৰিলে আগন্তুক লোকসভাৰ নিৰ্বাচনত এখনো আসন নাপাব কংগ্ৰেছে ৷ সেই কথা নিজে ভাবি চাওক কংগ্ৰেছে ৷”

লগতে আমিনুল ইছলামে ক’লে— “মিত্ৰতা কৰিলে বা নকৰিলে AIUDFৰ কোনো লোকচান নহয় ৷ মিত্ৰতা নকৰিলে কংগ্ৰেছৰহে লোকচান হ’ব ৷ মিত্ৰতা নকৰিলেও আমি তিনিটা সমষ্টিত জয়ী হম ৷”

মিত্ৰতা কেন্দ্ৰিক কংগ্ৰেছ-AIUDFৰ এই সংঘাত বা মুখ চুপতিৰ কাৰবাৰটোয়ে পিছে বৰকৈ ৰস দি আছে শাসকীয় পক্ষক ৷