হাইলাকান্দিত AIUDF আৰু AGP কৰ্মীৰ মাজত প্ৰচণ্ড মাৰপিট

সমাগত বিধানসভা নিৰ্বাচন। কোৰোণাৰ আতংকৰ বাবে সাধাৰণ ৰাইজে নিৰ্বাচনৰ কথা পাহৰিলেও, ৰাজনৈতিক দলসমূহৰ মাজত চলিছে তৎপৰতা। ইয়াৰ ফলস্বৰূপে হাইলাকান্দিত সংঘটিত হ’ল ৰাজনৈতিক সংঘাত! হাইলাকান্দি জিলাৰ অন্তৰ্গত জানকি বজাৰত আজি AIUDF আৰু AGP কৰ্মীৰ মাজতে সৃষ্টি হয় প্ৰচণ্ড মাৰপিটৰ। অভিযোগ অনুসৰি, জিলাখনৰ আলগাপুৰ সমষ্টিৰ এটা পথ নিৰ্মাণ কৰাক লৈ তীব্ৰ প্ৰতিবাদি কাৰ্যসূচী হাতত লৈছিলে AGP কৰ্মীসকলে। যাৰ বাবে বিধায়ক নিজাম উদ্দিন চৌধুৰীৰ পুত্তলিকা দাহ কৰি প্ৰতিবাদ সাব্যস্ত কৰিছিলে প্ৰতিবাদকাৰীসকলে।

কিন্তু AIUDF দলৰ কৰ্মীসকলে সহ্য কৰিব নোৱাৰিলে নিজ বিধায়কৰ অপমান। ফলতে AIUDF আৰু AGP কৰ্মীৰ মাজত প্ৰথমে সৃষ্টি হয় তীব্ৰ বাক–বিতণ্ডাৰ। লাহে লাহে বাক–বিতণ্ডাই ৰূপ লয় সংঘাতৰ। মুহুৰ্তৰ মাজতে দুই দলৰ কৰ্মীৰ মাজতে সৃষ্টি হয় তীব্ৰ মাৰপিট। ফলতে আঘাতপ্ৰাপ্ত হয় দুয়োটা দলৰ কৰ্মী। AGP দলৰ কৰ্মীৰ অভিযোগ, আলগাপুৰ সমষ্টিৰ বিধায়ক নিজাম উদ্দিন চৌধুৰীৰ নিৰ্দেশত AIUDFৰ কৰ্মীয়ে আক্ৰমণ কৰে তেওঁলোকৰ ওপৰত।

আনহাতে AIUDF দলৰ কৰ্মীয়ে অভিযোগ উত্থাপন কৰে যে AGP দলৰ শীৰ্ষ নেতাৰ নিৰ্দেশত AGP দলৰ কৰ্মীয়ে আক্ৰমণ চলাই AIUDFৰ কৰ্মীৰ ওপৰত। দুয়োটা পক্ষই নিজাববীয়াকৈ পাঁচগ্ৰাম আৰক্ষী চকীত গোচৰ ৰুজু কৰে। বৰ্তমানে ঘটনা সন্দৰ্ভত আৰক্ষীৰ তদন্ত অব্যাহত আছে।