Chilarai Divas Observed: ৰাজ্যজুৰি পালন বিশ্ববীৰ চিলাৰায় দিৱস

আজি ৰাজ্যজুৰি বিশ্বমহাবীৰ চিলাৰায় (Chilarai)ৰ ৫১২ সংখ্যক জন্মজয়ন্তী পালন কৰা হয় ৷ বঙাইগাঁৱতো বিভিন্ন দল-সংগঠনৰ উদ্যোগত দিনজোৰা কাৰ্যসূচীৰে চিলাৰায় দিৱস (Chilarai Divas) পালন কৰা হয় ৷ সদৌ অসম কোচ ৰাজবংশী যুৱ ছাত্ৰ সন্মিলনীৰ উদ্যোগত স্থানীয় গান্ধী ময়দানত চিলাৰায় দিৱসৰ আয়োজন কৰা হয় ৷ এই উপলক্ষে চিলাৰায়ৰ প্ৰতিছবিত মাল্যাৰ্পণ কৰে সমাজ কৰ্মী নন্দলাল বৰ্মনে ৷ ইয়াৰ পিছতে নাম প্ৰসংগ, আলোচনা সভা অনুষ্ঠিত হয় ৷

ইফালে বঙাইগাঁৱৰ (Bongaigaon) ৰাখলডুবিতো আক্ৰাছুৰ উদ্যোগত চিৰাৰায় দিৱসৰ আয়োজন কৰা হয় ৷ এই উপলক্ষে চিলাৰায়ৰ প্ৰতিমূৰ্তিত মাল্যাৰ্পণ কৰে কমতাপুৰ স্বায়ত্ব শাসিত পৰিষদৰ অধ্যক্ষ হিতেশ্বৰ বৰ্মনে ৷ দিৱসৰ লগত সংগতি ৰাখি নাম প্ৰসংগ, কোচ ৰাজবংশী লোকনৃত্য পৰিৱেশনৰ লগতে আলোচনা সভা অনুষ্ঠিত কৰা হয়। বঙাইগাঁও জিলা আক্ৰাছু আৰু ৰাখালডুবি আঞ্চলিক আক্ৰাছুৰ সহযোগত দিনযোৰাকৈ এই দিৱস পালন কৰা হয়। 

২০১৬ চনত তদানীন্তন মুখ্যমন্ত্ৰী সৰ্বানন্দ সোণোৱালে (Sarbananda Sonowal) কৰা ঘোষণামৰ্মে ৰাষ্টীয় ঘাইপথৰ দাতিত স্থাপন কৰা চিলাৰায়ৰ প্ৰতিমূৰ্তিস্থলীত প্ৰশাসনে কোনো ধৰণৰ কাৰ্যসূচী আয়োজন নকৰাত স্থানীয় ৰাইজে প্ৰতিক্ৰিয়া ব্যক্ত কৰে ৷  প্ৰশাসনৰ গুৰুত্বহীন মনোভাৱৰ বাবে স্থানীয় দল-সংগঠনৰ সহযোগত ৰাইজে চিলাৰায়ৰ প্ৰতিমূৰ্তিত মাল্যদান কৰি বিশ্ববীৰজনক শ্ৰদ্ধাঞ্জলি জ্ঞাপন কৰে।