Sarbananda Sonowal : বন্দৰ ব্যৱসায়ত নামিব পাৰিব অসমৰ লোক ৷ উত্তৰ-পূৰ্বাঞ্চলত স্থাপন হ'ব মেৰিটাইম বিশ্ববিদ্যালয় 

লক্ষ্য এটাই, অসম তথা উত্তৰ-পূবক সমৃদ্ধিশালী কৰাৰ ৷ এই উদ্দেশ্য লৈয়েই দুদিনীয়া কাৰ্যসূচীৰে পশ্চিমবঙ্গলৈ আহি উত্তৰ পূৰ্বাঞ্চলৰ বাবে সম্ভৱনাৰ দুৱাৰ মুকলি কৰিলে কেন্দ্ৰীয় মন্ত্ৰী সৰ্বানন্দ সোণোৱালে (Sarbananda Sonowal) ৷ উঠি অহা প্ৰজন্মক যাতে বন্দৰ ব্যৱসায়ৰ বাবে দক্ষ কৰি তুলিব পাৰি তাৰ বাবে উত্তৰ পূৰ্বাঞ্চলত স্থাপন কৰিব ইণ্ডিয়ান মেৰিটাইম বিশ্ববিদ্যালয় (Indian Maritime University)ৰ শাখা। পশ্চিমবঙ্গত এই কথা ঘোষণা কৰিছে কেন্দ্ৰীয় বন্দৰ, জাহাজ আৰু জলপথ তথা আয়ুষ মন্ত্ৰী সৰ্বানন্দ সোণোৱালে।

উল্লেখযোগ্য যে, ইণ্ডিয়ান মেৰিটাইম বিশ্ববিদ্যালয়ৰ দেশজুৰি আছে ৬টা শাখা ৷ চেন্নাই, কোচি, কলকাতা, মুম্বাই, নবী মুম্বাই আৰু বিশাখাপট্টনমত আছে মেৰিটাইম বিশ্ববিদ্যালয়ৰ শাখা । উত্তৰ পূৰ্বাঞ্চল (NorthEast India)ত ইয়াৰ চৌহদ তথা শাখা স্থাপন কৰিলে স্বাভাৱিকতে সামুদ্ৰিক ব্যৱসায় সন্দৰ্ভত অধ্যয়ন কৰাৰ লগতে আভ্যন্তৰীণ জল পৰিবহণ (Water Ways) খণ্ডত নিয়োগৰ সম্ভাৱনা লাভ কৰিব অসম, উত্তৰ-পূৰ্বাঞ্চলৰ যুৱক-যুৱতীয়ে।

দুদিনীয়া কাৰ্যসূচীৰে আহি প্ৰথম দিনাই সোণোৱালে মুখাৰ্জী বন্দৰত কেইবাটাও গুৰুত্বপূৰ্ণ প্ৰকল্পৰ শুভাৰম্ভণি কৰে। প্ৰধান মন্ত্ৰী নৰেন্দ্ৰ মোদীয়ে দেশৰ আমদানি-ৰপ্তানি খণ্ডত যাতে উত্তৰ পূৰ্বাঞ্চলো অন্তৰ্ভূক্ত হয় তাৰ ওপৰত গুৰুত্ব দিছে বুলি সদৰি কৰে কেন্দ্ৰীয় মন্ত্ৰী গৰাকীয়ে। উত্তৰ-পূৱৰ উৎপাদিত সামগ্ৰী দেশ-বিদেশলৈ যাতে ৰপ্তানি কৰিব পাৰে, কৃষকে যাতে এখন বিশাল বজাৰ লাভ কৰে আৰু উত্তৰ পূৱে প্ৰয়োজনীয় সামগ্ৰী কম ব্যয়তে ক্ৰয় কৰিব পাৰে তাৰবাবে জলপথ সুদৃঢ় কৰাত জোৰ দিয়া হৈছে।

ইংৰাজৰ শাসন কালত উত্তৰ পূৰ্বাঞ্চলে যিদৰে দেশৰ অৰ্থনীতিলৈ অৰিহনা আগবঢ়াইছিল অনুৰূপ ধৰণে দেশৰ অৰ্থনীতি টনকিয়াল কৰিব পাৰে তাৰ বাবে বংগোপ সাগৰেৰে সংযোগ কৰাৰ বাবে কেন্দ্ৰীয় চৰকাৰে সংকল্প লৈছে। ইয়াৰ আধাৰত ইতিমধ্যে ভাৰত-বাংলাদেশ প্ৰট'কল পথেৰে ৰাষ্ট্ৰীয় নদী পথ-২ (National WaterWay-2)ক অচিৰেই শ্যামা প্ৰসাদ মুখাৰ্জী বন্দৰ আৰু উত্তৰ পূৱক সংযোগ কৰা হ'ব আৰু পৰৱৰ্তী পৰ্যায়ত চট্টগ্রাম বন্দৰলৈ প্ৰসাৰিত কৰিব। ইয়াৰ কেৱল উত্তৰ পূৱৰ ৮ খন ৰাজ্যৰ লগতে ভূটান, নেপাল, ম্যানমাৰ আদি দেশ উপকৃত হব।

ৰাষ্ট্ৰীয় নদী পথ-২(ব্ৰহ্মপুত্ৰ) আৰু ৰাষ্ট্ৰীয় নদী পথ-১৬(বৰাক)ক যথাসম্ভৱ সোনকালে বংগোপ সাগৰ (Bay of Bengal)ৰ সৈতে সংযোগ কৰি উত্তৰ পূৱৰ উৎপাদিত সমগ্ৰীয়ে যাতে ভৱিষ্যতে সমগ্ৰ দেশ তথা এছিয়া মহাদেশ আৰু পৃথিৱীৰ বজাৰ দখল কৰিব পাৰি তাৰ ওপৰতো জোৰ দিয়া হৈছে। আন্তঃৰাষ্ট্ৰীয় বজাৰৰ সৈতে সংযুক্ত হোৱাৰ লগে লগে সংস্থাপনৰ দুৱাৰো মুকলি হব বুলি কয় সোণোৱালে। এই সপোন বাস্তৱায়িত কৰাৰ বাবে কেন্দ্ৰীয় চৰকাৰে ইতিমধ্যে ৫.৫ লাখ কোটি টকীয়া 'সাগৰমালা' (Sagarmala) নামেৰে এক অভিলাষী আঁচনি গ্ৰহণ কৰিছে আৰু ইয়াৰ দ্বাৰা নদী আৰু সাগৰ সংযোগ কৰি জলপথ সুচল কৰাৰ পৰিকল্পনা হাতত লৈছে বুলিও জানিবলৈ দিয়ে।

উত্তৰ পূৱৰ যুৱক, যুৱতী সকলক বন্দৰ ব্যৱসায় (Port Business)ত আত্মনিয়োগ কৰিবলৈ মানসিক ভাৱে প্ৰস্তুত হ'বলৈকো সোণোৱালে আহ্বান জনায়। ইয়াৰ কাৰিকৰী দিশ সন্দৰ্ভত ভাৰত চৰকাৰে বিশেষ ভূমিকা পালন কৰিব আৰু সেই উদ্দেশ্যেই মেৰিটাইম বিশ্ববিদ্যালয়ৰ শাখা স্থাপন কৰা হ'ব বুলি কয় কেন্দ্ৰীয় মন্ত্ৰী সৰ্বানন্দ সোণোৱালে।