উপ-নিৰ্বাচন হ'বলগীয়া পাঁচ সমষ্টিত শক্তিশালী স্থিতিত কোন? বিগত নিৰ্বাচনত কোনে কিমান পাইছিল ভোট?
বিজেপি মিত্ৰজোঁটক ৰোধ কৰা সহজ হ'বনে বিৰোধীৰ বাবে?
মাজুলীক বাদ দি ৫টা সমষ্টিত ৩০ অক্টোবৰত অনুষ্ঠিত হ'ব উপ-নিৰ্বাচন৷ এই পাঁচটা সমষ্টিত ২০২১ৰ নিৰ্বাচনত কি হৈছিল ৷ কোনে পাইছিল কিমান ভোট ৷ কাউণ্ট ডাউন আৰম্ভ হৈছে উপ-নিৰ্বাচনৰ ৷ কি হ'ব উপ-নিৰ্বাচনত? মিত্ৰজোঁটক ৰুধিব পাৰিবনে বিৰোধীয়ে?
৩০ অক্টোবৰত ৫টা সমষ্টিত অনুষ্ঠিত হ'বলগীয়া উপ–নিৰ্বাচনক লৈ সকলো ৰাজনৈতিক দল এতিয়া ব্যস্ত ৷ ২০২১ত এই পাঁচোটা সমষ্টিৰ মাথোঁ এটা সমষ্টিহে লাভ কৰিছিল বিজেপি মিত্ৰজোঁটে ৷ বিজেপি মিত্ৰজোঁটে লাভ কৰা একমাত্ৰ তামুলপুৰ সমষ্টিটোত UPPLৰ প্ৰয়াত বিধায়ক লেহোৰাম বড়োৱে লাভ কৰিছিল ৭৮,৮১৮টা ভোট৷ সমষ্টিটোত কংগ্ৰেছ মহাজোঁটৰ বিপিএফৰ প্ৰাৰ্থী ৰাংজা খুংগুৰ বসুমতাৰীয়ে পাইছিল ৪৬,৬৩৫টা ভোট ৷
ইয়াৰ বিপৰীতে গোসাঁইগাঁও সমষ্টিটোত বিপিএফৰ প্ৰয়াত বিধায়ক মাজেন্দ্ৰ নাৰ্জাৰীয়ে লাভ কৰিছিল ৭০,৪০৭টা ভোট, য'ত UPPLৰ প্ৰাৰ্থী সোমনাথ নাৰ্জাৰীয়ে পাইছিল ৬০,০৬৪টা ভোট ৷ সম্প্ৰতি এই দুয়োটা সমষ্টি একপ্ৰকাৰ UPPLক এৰি দিবলৈ ওলাইছে বিজেপিয়ে ৷ যি কথা শনিবাৰে নিশা অনুষ্ঠিত হোৱা বিজেপিৰ নিৰ্বাচন সমিতিৰ বৈঠকৰ পিছত সংবাদ মাধ্যমক অৱগত কৰিছিল বিজেপি নেতা জয়ন্ত মল্ল বৰুৱাই ৷
উপ–নিৰ্বাচন অনুষ্ঠিত হ'বলগীয়া ভৱানীপুৰত AIUDFএৰি বিজেপিলৈ অহা ফণীধৰ তালুকদাৰে পাইছিল ৫৫,৯৭৫টা ভোট, য'ত বিজেপি মিত্ৰজোঁটৰ অগপৰ প্ৰাৰ্থী ৰঞ্জিত ডেকাই লাভ কৰিছিল ৫২,৭৪৮টা ভোট ৷ ঠিক একেদৰে থাওৰা সমষ্টিত কংগ্ৰেছ এৰি বিজেপিলৈ অহা সুশান্ত বৰগোহাঁয়ে লাভ কৰিছিল ৪৮,০২৬টা ভোট ৷ সমষ্টিটোত কুশল দুৱৰীয়ে পাইছিল ৪৬,০২০টা ভোট ৷
একেদৰে উপ–নিৰ্বাচন অনুষ্ঠিত হ'বলগীয়া মৰিয়নি বিধানসভা সমষ্টিত কংগ্ৰেছ ত্যাগ কৰি বিজেপিলৈ অহা ৰূপজ্যোতি কুৰ্মীয়ে পাইছিল ৪৭,৩০৮টা ভোট ৷ বিজেপিৰ ৰমণী তাঁতীয়ে পাইছিল ৪৪,৮৬২টা ভোট ৷ অৰ্থাৎ বিজেপি মিত্ৰজোঁট পৰাজিত হোৱা থাওৰাত আছিল ২০০৬টা ভোটৰ ব্যৱধান ৷
মৰিয়নিত বিজেপি মিত্ৰজোঁট পৰাজিত হৈছিল ২৪৪৬টা ভোটত ৷ ভৱানীপুৰত মহাজোঁটৰ প্ৰাৰ্থীৰ সৈতে পৰাজয়ৰ অংকৰ ব্যৱধান আছিল ৩২২৭টা ভোটৰ ৷ একমাত্ৰ গোসাঁইগাঁৱত ১০,৩৪৩টা ভোটৰ ব্যৱধানত পৰাজিত হৈছিল বিজেপি মিত্ৰজোঁটৰ প্ৰাৰ্থী ৷ গোটেই সমষ্টিকেইটা যদি চোৱা যায়, ভৱানীপুৰত এক নিজা ভোট বেংক আছে ফণীধৰ তালুকদাৰৰ৷
নিৰ্দলীয় হিচাপে খেলিলেও সমষ্টিটোত ২০ৰ পৰা ৩০ হাজাৰ ভোট লাভ কৰি আহিছিল ফণীধৰ তালুকদাৰে ৷ থাওৰাত আছে সুশান্ত বৰগোহাঁইৰ নিজা ভোট বেংক, একেদৰে মৰিয়নিত আছে ৰূপজ্যোতি কুৰ্মীৰ নিজা ভোট বেংক ৷ অংকৰ দিশত এই তিনিটা সমষ্টিৰ লগতে তামুলপুৰ প্ৰমোদ বড়োৰ গৃহ সমষ্টি হোৱা হেতুকে এই চাৰিটা সমষ্টিতে বিজেপি মিত্ৰজোঁট আজিৰ তাৰিখত শক্তিশালী ৷
গোসাঁইগাঁৱৰ ক্ষেত্ৰত যদি বিপিএফৰ সৈতে বুজাবুজিলৈ আহে BJP–UPPL, তেনেহ'লে উপ–নিৰ্বাচন হ'বলগীয়া পাঁচোটা সমষ্টিত বিৰোধীয়ে বিজেপি মিত্ৰজোঁটক প্ৰতিৰোধ কৰা বৰ সহজ নহ'ব ৷
