ৰঙিয়াত নিয়ন্ত্ৰণ হেৰুৱাই পুখুৰীত সোমাল বাছ, নিৰ্বাচনৰ দায়িত্বত থকা সুৰক্ষাকৰ্মী কঢ়িয়াই আনিছিল বাছখনে

ৰঙিয়াত নিৰ্বাচনৰ দায়িত্বত থকা সুৰক্ষাকৰ্মী কঢ়িওৱা গাড়ী দুৰ্ঘটনাগ্ৰস্ত। বাক্সা জিলাৰ তামুলপুৰৰ পৰা নিৰ্বাচনৰ দায়িত্ব সম্পন্ন কৰি আহি থকা অৱস্থাত ৰঙিয়া তিনিআলিত AS-01-HC-6324 নম্বৰৰ বাছখনে নিয়ন্ত্ৰণ হেৰুৱাই প্ৰথমে এটি বিদ্যুতৰ খুঁটাত খুন্দা মাৰে। তাৰ পিছতে এডাল গছত খুন্দিয়াই ওচৰতে থকা আছুৰ শ্বহীদ বেদী প্ৰাংগণৰ পকী বেৰ খুন্দা লাগি এটা পুখুৰীত সোমাই পৰে।

দুৰ্ঘটনাটোত বহুকেইজন পথচাৰী কোনোমতে ৰক্ষা পৰে। এখন প্ৰাথমিক বিদ্যালয়ৰ সন্মুখত সংঘটিত এই দুৰ্ঘটনাত বাছখনত থকা এজন আৰপিএছ‌এফ জোৱান গুৰুতৰভাৱে আহত হোৱাৰ লগতে বহুকেইজন জোৱান কিছু পৰিমাণে আহত হয়।

পিছত আহত জোৱানক ৰঙিয়াৰ ৰে’লৱে পলিক্লিনিক হাস্পতালত ভৰ্তি কৰোৱা হয়। জোৱানকেইজনে পশ্চিম বংগৰ নিৰ্বাচনৰ দায়িত্বৰ বাবে আজি ৰাওনা হোৱাৰ বাবে ৰঙিয়ালৈ আহি আছিল।