ডিব্ৰুগড়ত পুনৰ নৃশংস হত্যাকাণ্ড, ক্ষত-বিক্ষত অৱস্থাত উদ্ধাৰ ২২ বছৰীয়া যুৱকৰ মৃতদেহ

পুনৰ জঘন্য হত্যাকাণ্ডৰ ঘটনাই চাঞ্চল্যৰ সৃষ্টি কৰিছে ডিব্ৰুগড়ত। চোকা অস্ত্ৰৰে ডিঙি ৰেপি হত্যা যুৱকক। ডিব্ৰুগড়ৰ চানমাৰি ঘাটৰ স্থানীয় ২২ বছৰীয়া যুৱক ৰজেশ সিং যোৱা বৃহস্পতিবাৰৰ পৰা নিৰুদ্দেশ হৈ আছিল। শুকুৰবাৰে পুৱা ৰাজেশ সিঙৰ ক্ষত–বিক্ষত মৃতদেহ পল্টন বজাৰৰ ব্ৰহ্মপুত্ৰৰ পাৰৰ ধুবি ঘাটত স্থানীয় লোকে প্ৰত্যক্ষ কৰে। লগে লগে ডিব্ৰুগড় আৰক্ষী উপস্থিত হয় ঘটনাস্থলীত। স্নীফাৰ ডগৰ সহায়ত আৰক্ষীয়ে ঘটনাস্থলীত বহু সময় ধৰি অভিযান চলাই যদিও ঘটনা সন্দৰ্ভত কোনো লোকক বৰ্তমানলৈকে আটক কৰা হোৱা নাই।

মৃত ৰাজেশ সিঙৰ ডিঙিত চোকা অস্ত্ৰৰে ৰেপাৰ চিন স্পষ্ট হৈ আছে। লগতে মূৰতো চোকা অস্ত্ৰৰে উপৰ্যুপৰি আঘাত কৰা চিন আছে। আঘাতৰ চিহ্নলৈ লক্ষ্য কৰি ইয়াক পৰিকল্পিত হত্যা বুলি সন্দেহ কৰিছে আৰক্ষী আৰু স্থানীয় লোকে।

স্থানীয় লোকৰ অভিযোগ অনুসৰি, ডিব্ৰুগড়ৰ চানমাৰি অঞ্চলত দীৰ্ঘদিনৰে পৰা মদ-জুৱাৰ অবৈধ ঘাটি বৃদ্ধি পাই আহিছে। এই ঘাটিসমূহত নানা ধৰণৰ অসামাজিক কাৰ্যকলাপ হৈ থাকে। বিভিন্ন সময়ত এই ঘাটিবোৰত কাজিয়া সূত্ৰপাত হৈ থকাৰো অভিযোগ আছে।তদুপৰি নিশা হ’লেই সেই অঞ্চলৰে সাধাৰণ লোক অহা–যোৱা কৰিব নোৱাৰা অৱস্থাৰ সৃষ্টি হয়। এই বিষয়ে বাৰে বাৰে আৰক্ষীক অভিযোগ দি থকা হৈছে যদিও আৰক্ষীয়ে কোনো ব্যৱস্থা গ্ৰহণ কৰা নাই। যাৰ ফলত হত্যাৰ দৰে ঘটনা সংঘটিত হ’বলৈ পাইছে।