‘নীলা ৰঙৰ লুঙি সংৰক্ষণৰ প্ৰতিশ্ৰুতি দিছিল বিজেপিয়ে’, মৌলিক সমস্যাৰ পৰা ৰাইজক আঁতৰাবলৈ বিজেপিয়ে মিঞা মিউজিয়ামক ইচ্ছু বনাইছেঃ জগদীশ ভূঞা

বদৰুদ্দিন আজমল বিজেপিৰ ব্ৰেণ্ড এম্বেছেদৰ ৷ BJP আৰু AIUDFৰ দুটা ধৰ্মীয় লোকক মেৰু বিভাজনৰ প্ৰক্ৰিয়া দৰাচলতে এক গোপন বুজাবুজি ৷ ‘নীলা ৰঙৰ লুঙি’ সংৰক্ষণৰ ব্যৱস্থা বিজেপি দলৰ ৷ বিজেপিয়ে তেওঁলোকৰ ‘Vision Document’ ত “নীলা লুঙি” সংৰক্ষণৰ প্ৰতিশ্ৰুতি দিছিল ৷ মিঞা মিউজিয়াম এক অনৰ্থক বিষয়। মাত মাতিবলৈ অসমত বহু মৌলিক সমস্যা আছে ৷ ২০২১ ত চৰকাৰ গঠন কৰিব অসম জাতীয় পৰিষদে। গভীৰ আশাবাদী আৰু আত্মবিশ্বাসী অসম জাতীয় পৰিষদ ৷ তেজপুৰত এনেদৰে মন্তব্য কৰিলে অসম জাতীয় পৰিষদৰ জগদীশ ভূঞাই।

জগদীশ ভূঞাই লগতে কয় যে, ‘এই সমগ্ৰ কথা-বতৰাবোৰ বিজেপিৰেই সৃষ্টি ৷ বৃহত্তৰ অসমৰ জাতি সত্বাৰ স্বাভিমানক আক্ৰমণ কৰিবলৈ কাকো সুযোগ নিদিওঁ, লাগিলে মন্ত্ৰী হিমন্তই হওক, বিজেপিয়েই হওক বা AIUDFয়েই হওক নাইবা শ্বেৰমান আলীয়েই হওক। তেনে আক্ৰমণ প্ৰতিহত কৰিবলৈ অসমীয়া জাতি সাজু আছে৷’

জগদীশ ভূঞাৰ মতে, অসমত মৌলিক সমস্যা বহু আছে ৷ মৌলিক সমস্যাৰ পৰা দৃষ্টি আঁতৰাবলৈহে “মিঞা মিউজিয়াম”ৰ প্ৰসংগক অনাহকত ইচ্ছ্যু কৰি লোৱা হৈছে ৷

২০২১ ৰ নিৰ্বাচনক লৈ কিমান আশাবাদী অসম জাতীয় পৰিষদ?

২০২১ত অসমত অসম জাতীয় পৰিষদে গঠন কৰিব চৰকাৰ। অসমৰ ১২৬ টা সমষ্টিতে দলটোৱে প্ৰাৰ্থী থিয় কৰাব আৰু ইয়াৰ বাবে ৰণনীতি প্ৰস্তুত কৰাৰ কথা উল্লেখ কৰে জগদীশ ভূঞাই।

উল্লেখ্য যে, দেওবাৰে তেজপুৰ জিলা পুথিভৰাঁলত অনুষ্ঠিত হয় অসম জাতীয় পৰিষদৰ যোগদান কাৰ্যসূচী আৰু তেজপুৰ বিধানসভা সমষ্টিৰ আহ্বায়ক সমিতি গঠন প্ৰক্ৰিয়া ৷ জাতীয় পৰিষদৰ কেন্দ্ৰীয় সমিতিৰ হৈ অদীপ ফুকন, জগদীশ ভূঞা, জীয়াউৰ ৰহমানৰ উপস্থিত থকা এই সভাতে আনুষ্ঠানিকভাৱে নতুন আঞ্চলিক দলটোত যোগদান কৰে সহস্ৰাধিক লোকে।