‘মোৰ মাতৃও শংকিত হৈ পৰিছিল’- পহিলা জানুৱাৰীৰ দিনটোত ৰাজ্যিক বিজেপিৰ সভাপতি ৰণজিত্‍ দাসৰ তাত্‍পৰ্যপূৰ্ণ মন্তব্য

‘নাগৰিকত্ব সংশোধনী আইনৰ ফলত অসমলৈ ট্ৰাকে ট্ৰাকে বিদেশী আহিব নেকি? মোৰ মাতৃয়ে এই প্ৰশ্ন কৰি শংকিত হৈ পৰিছিল। কিন্তু নাগৰিকত্ব সংশোধনী আইনৰ ফলত এজনো বিদেশী অসমলৈ অহা নাই।’- নতুন বছৰৰ প্ৰথম দিনটোতে সংবাদমেল সম্বোধন কৰি এই মন্তব্য কৰে বিজেপিৰ ৰাজ্যিক সভাপতি ৰণজিত্‍ দাসে।

ইংৰাজী নৱবৰ্ষৰ পহিলা দিনটোত বিজেপিৰ বাৰ্তা আলোচনী উন্মোচন কৰে ৰাজ্যিক বিজেপিৰ সভাপতি ৰণজিত্‍ দাসে ৷ অনুষ্ঠানতে সংবাদ মাধ্যমত কৰ্মৰত সকলো কৰ্মীক নৱবৰ্ষৰ শুভকামনা জনাই ৰাজ্যিক বিজেপিৰ সভাপতিগৰাকীয়ে ৷ আগন্তুক নিৰ্বাচনকলৈ অসমবাসী ৰাইজৰ আশীৰ্বাদ বিচাৰে দলৰ সভাপতিগৰাকীয়ে ৷

সংবাদমেলত ৰণজিত্‍ দাসে কয় যে,‘ বিজেপিয়ে পূৰ্বে প্ৰদান কৰা সকলো প্ৰতিশ্ৰুতি পূৰণ কৰিবলৈ সক্ষম হৈছে ৷ জাতি মাটি ভেটি ৰক্ষা কৰিবলৈ সক্ষম হৈছে ৷ যদিও আইনী মেৰপাকৰ বাবে NRC বাস্তবায়িত কৰিব পৰা নাই ৷ কোনো কাৰণত ভাৰতীয় এগৰাকী ভাৰতীয়ৰ নাম কৰ্তন হ’ব নোৱাৰে ৷ চৰকাৰে ১০০ শতাংশ পুনৰীক্ষণৰ দাবী কৰিছিল, কিন্তু সেয়া নহ’ল ৷ কেন্দ্ৰীয় চৰকাৰে ৰাজ্য চৰকাৰক সম্পূৰ্ণ দায়িত্ব দিলে আমি কাম সম্পূৰ্ণ কৰিম।’

আনহাতে আগন্তুক নিৰ্বাচনত বিজেপিয়ে ১০০ খন আসন দখল কৰি ৰাজ্যত চৰকাৰ গঠন কৰাটো নিশ্চিত বুলি উল্লেখ কৰে ৰণজিত্‍ দাসে। ২০২১ৰ নিৰ্বাচনৰ প্ৰতি লক্ষ্য ৰাখি ৩ জানুৱাৰীত বুথ কি বাট কাৰ্যসূচী হাতত লৈছে বিজেপিয়ে। সেইদৰে ৫ ৰ পৰা ১১ জানুৱাৰীলৈকে  প্ৰতিটো বুথত ৰাজনৈতিক সভা অনুষ্ঠিত কৰিব বিজেপিয়ে। এই কথা সংবাদ মেলত জনাই বিজেপিৰ ৰাজ্যিক সভাপতিগৰাকীয়ে।