BL Santhosh: কাইলৈ অসম পাবহি বিজেপিৰ ৰাষ্ট্ৰীয় নেতা বি এল সন্তোষ, কাৰ্যনিৰ্বাহক বৈঠকত কি কথাই পাব স্থান?
২৩ ছেপ্টেম্বৰত থাকিব আটাইতকৈ গুৰুত্বপূৰ্ণ হিচাপে বিবেচিত ৰাজনৈতিক প্ৰস্তাৱ।
২৩ ছেপ্টেম্বৰত থাকিব আটাইতকৈ গুৰুত্বপূৰ্ণ হিচাপে বিবেচিত ৰাজনৈতিক প্ৰস্তাৱ।
- News18 Assam
- Last Updated :
উত্তৰ গুৱাহাটীত বুধবাৰৰ পৰা দুদিনীয়াকৈ হ'ব ৰাজ্যিক বিজেপিৰ কাৰ্যনিৰ্বাহক৷ কাৰ্যনিৰ্বাহকত ভাগ ল'বৰ বাবেই অসমলৈ দুদিনৰ বাবে আহি আছে বিজেপিৰ ৰাষ্ট্ৰীয় সাংগঠনিক সাধাৰণ সম্পাদক বি এল সন্তোষ৷ কাৰ্যনিৰ্বাহকত উপস্থিত থাকিব ৰাষ্ট্ৰীয় সাধাৰণ সম্পাদক দিলীপ শইকীয়া, অসমৰ প্ৰভাৰী বৈজয়ন্ত জয় পাণ্ডা, সহঃপ্ৰভাৰী পৱন শৰ্মা, অংশ ল'ব কেন্দ্ৰীয় কেবিনেট মন্ত্ৰী সৰ্বানন্দ সোণোৱাল, কেন্দ্ৰীয় ৰাজ্যিক মন্ত্ৰী ৰামেশ্বৰ তেলীয়ে ৷
এই কাৰ্যনিৰ্বাহকত ভাগ ল'ব মুখ্যমন্ত্ৰী ড৹ হিমন্ত বিশ্ব শৰ্মা, বিজেপিৰ সকলো মন্ত্ৰী সাংসদ তথা কাৰ্যনিৰ্বাহক সদস্যই ৷ সভাপতি হিচাপে দায়িত্ব লোৱাৰ পিছত ভৱেশ কলিতাৰ কাৰ্যকালৰ প্ৰথমখন কাৰ্যনিৰ্বাহক দুদিনীয়াকৈ অনুষ্ঠিত হ'ব উত্তৰ গুৱাহাটীত, য'ত প্ৰত্যেকগৰাকী প্ৰাক্তন সভাপতিয়ে দলীয় পতাকা উত্তোলনেৰে শুভাৰম্ভ ঘটাব কাৰ্যনিৰ্বাহকখনৰ ৷
কাৰ্যনিৰ্বাহক বৈঠকৰ পূৰ্বে আমিনগাঁৱত হ'ব বিষয়ববীয়া বৈঠক ৷ পুৱা দহ বজাত হ'ব এই বৈঠক ৷ বৈঠকত উপস্থিত থাকিব সকলো বিষয়ববীয়া ৷ বিয়লি ২বজাত উত্তৰ গুৱাহাটীত আৰম্ভ হ'ব কাৰ্যনিৰ্বাহক বৈঠক ৷ আমাৰ হাতত থকা খবৰ অনুসৰি, কাৰ্যনিৰ্বাহকৰ প্ৰথম দিনটোতে ৰাষ্ট্ৰীয় সাধাৰণ সম্পাদক দিলীপ শইকীয়া, প্ৰভাৰী বৈজয়ন্ত জয় পাণ্ডা, সহঃপ্ৰভাৰী পৱন শৰ্মাই কাৰ্যনিৰ্বাহকক উদ্দেশ্যি কৰিব মাৰ্গ দৰ্শন ৷
জানিব পৰা মতে, মিউনিচিপালিটী নিৰ্বাচনৰ কথাই স্থান পাব বৈঠকত ৷ যি কথা উত্থাপন কৰিব মন্ত্ৰী অশোক সিংহলে ৷ যি প্ৰস্তাৱৰ আলোচনাত ভাগ প্ৰাক্তন বিধায়ক নাৰায়ণ ডেকা আৰু বিহপুৰীয়াৰ বিধায়ক ড৹ অমিয় ভূঞাই ৷ বৈঠকত চৰকাৰে কৰা দুৰ্নীতিবিৰোধী কাম–কাজ, সংস্কাৰৰ কথাক লৈ ধন্যবাদসূচক প্ৰস্তাৱ থাকিব ৷ এই প্ৰস্তাৱত ভাগ ল'ব দেৱলাল গাৰ্লোছাকে ধৰি অন্যান্যই ৷
কাৰ্যনিৰ্বাহক বৈঠকৰ মাজতে জলজীৱন আঁচনিক লৈ কাইলৈ অডিঅ' ভিজুৱেল প্ৰেজেণ্টেচন দিব মন্ত্ৰী ৰঞ্জিত দাসে ৷ খবৰ অনুযায়ী, নিশা ৯ বাজি ২০ মিনিটত ভাষণ ৰাখিব সৰ্বানন্দ সোণোৱালে ৷ নিশা ১০ বজাত মুখ্যমন্ত্ৰীকে ধৰি জিলা সভাপতি, প্ৰভাৰীৰে সৈতে আছুতীয়াকৈ পুনৰ বৈঠকত মিলিত হ'ব বি এল সন্তোষ ৷ ২৩ ছেপ্টেম্বৰত থাকিব আটাইতকৈ গুৰুত্বপূৰ্ণ হিচাপে বিবেচিত ৰাজনৈতিক প্ৰস্তাৱ ৷ কাৰণ ২৩ ছেপ্টেম্বৰত অসম প্ৰদেশ বিজেপিক মাৰ্গ দৰ্শন কৰাব ৰাষ্ট্ৰীয় সাংগঠনিক সাধাৰণ সম্পাদক বি এল সন্তোষ, মুখ্যমন্ত্ৰী ড৹ হিমন্ত বিশ্ব শৰ্মাই ৷
অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|
