আজি ৰাজ্যৰ ৰাজনীতিলৈ আহিব মহা পৰিৱৰ্তন!

শুকুৰবাৰে ৰাজ্যৰ ৰাজনীতিলৈ আহিব মহা পৰিৱৰ্তন। এখোপ আগুৱাব নতুন আঞ্চলিক ৰাজনৈতিক শক্তিৰ জন্মৰ। আছু আৰু এ জে ৱাই চি পিৰ নেতৃত্বত গঠন হ’বলগীয়া আঞ্চলিক ৰাজনৈতিক শক্তি জন্মৰ বীজ অংকুৰিত হ'ব। সংবাদমেল যোগে নতুন ৰাজনৈতিক শক্তি গঠনৰ বাবে আহ্বায়ক কমিটী গঠন কৰিব আছু–AJYCPয়ে।

কিন্তু প্ৰস্তাবিত বহু চৰ্চিত নতুন আঞ্চলিক শক্তিত থাকিব নে অখিল গগৈৰ দল? কাৰণ সোমবাৰে অখিল গগৈয়ে বিজেপিক উৎখাতৰ স্বাৰ্থত সকলোকে একত্ৰিত হোৱাৰ আহ্বান জনোৱাৰ পিছতো আছু AJYCPয়ে লৈছিল কৌশলি স্থিতি ৷ আছু যুৱ ছাত্ৰ পৰিষদৰ এনে স্থিতিৰ বাবেই আৰু আঞ্চলিক শক্তি বহুধা বিভক্ত হোৱাৰ ছবিখন চকুৰ আগত দেখা পাই বৃস্পতিবাৰে পুনৰ অখিল গগৈৰ আহ্বান –একলগ হওক, নহলে ভয়ংকৰ বিপদ আহি আছে।

GMCHত স্বাস্থ্য পৰীক্ষা কৰিবলৈ আহি অখিল গগৈয়ে আছু আৰু যুৱ ছাত্ৰ পৰিষদক সমালোচনা কৰি ক'লে "নিজৰ স্থিতি স্পষ্ট কৰক। অজুহাত এৰক। যদি বিজেপিক ৱাক অভাৰ দিব বিচাৰিছে তেতিয়া হ'লে ১০টা দল খোলক।"

অখিল গগৈৰ এই ক্ষুৰধাৰ সমালোচনাৰ পিছত মুখ খুলিছে যুৱ ছাত্ৰ পৰিষদে। "বিজেপিক ৱাক অভাৰৰ কথা কৈ অপৰিপক্কতাৰ পৰিচয় দিছে অখিল গগৈয়ে। নিজে দল খুলি নিজকে মুখ্যমন্ত্ৰী হিচাপে প্ৰক্ষেপ কৰিছে। মিত্ৰতাৰ কথা কোৱা মানুহক এই কাম কৰাৰ অধিকাৰ কোনে দিলে৷"

AJYCP বিজেপিক উৎখাতৰ লক্ষ্য লোৱা আঞ্চলিক শক্তিৰ মাজত দেখা দিয়া মনোমানিল্যক লৈ উৎফুল্লিত শাসক দল। আঞ্চলিক শক্তিক তাচ্ছিল্য কৰি বিধায়ক ৰণোজ পেগুৱে ক'লে,"যদু মধুৱে পিচিঅ' খোলাৰ দৰে দল খুলিছে।" আচলতে বিধায়ক ৰণোজ পেগুৰ কথাক হয়টো কোনোৱে নুই কৰিব নোৱাৰিব। কাৰণ বিজেপিক উৎখাতৰ লক্ষ্য লোৱা আঞ্চলিক শক্তি বহুধা বিভক্ত। এক হোৱাৰ লক্ষ্য সুদূৰ পৰাহত। আজিৰ দিনত জাতীয়তাবাদৰ কথা কোৱা  আছু, এজেৱাইছিপি, কৃষক মুক্তি সংগ্ৰাম সমিতিৰ ৰেহৰূপ দেখি এনে ভাৱ হৈছে যে আঞ্চলিক শক্তি এক হোৱাটো অলীক কল্পনা।