Bees to Protect From Wild Elephants মৌ মাখিয়ে খেদিব বনৰীয়া হাতী ! হাতী-মানুহৰ সংঘাত দূৰ কৰিবলৈ অভিলাষী আঁচনি

শেহতীয়াকৈ হাতী-মানুহৰ সংঘাতে (Man-Elephant Conflict) তীব্ৰ ৰূপ ধাৰণ কৰা গোৱালপাৰা (Goalpara) জিলাত হাতী-মানুহৰ সংঘাত প্ৰৰিৰোধ তথা স্থায়ী সমাধানৰ বাবে আগবাঢ়ি আহিছে কেন্দ্ৰীয় খাদী গ্ৰামোদ্যোগ আয়োগে ৷ গোৱালপাৰাৰ  মৰনৈত কেন্দ্ৰীয় খাদী গ্ৰামোদ্যোগ আয়োগে উত্তৰ পূৰ্বাঞ্চলত প্ৰথম বাৰৰ বাবে শুভাৰম্ভ কৰে ’ৰি-হেভ’ নামৰ এখন অভিলাসী আচঁনি  এই আচঁনিৰ যোগেদি বনৰীয়া হাতীৰ সংঘাত নিৰ্মূল কৰিব আৰু বনৰীয়া হাতীৰ উপদ্ৰৱ থকা অঞ্চল সমূহত ঘুৰি আহিব স্থায়ী শান্তি৷

“ৰি-হেব“(Reducing Elephant- Human Attack Using Bees) হ'ল মৌ মাখিৰ (Honey Bees) পৰা মানুহক বনৰীয়া হাতীৰ সংঘাতৰ পৰা পৰিত্ৰাণ দিয়াৰ এক অভিনৱ প্ৰকল্প ৷ প্ৰথম অৱস্থাত কেন্দ্ৰীয় খাদী গ্ৰামোদ্যোগ আয়গে এই অভিলাসী আঁচনিখন ৰূপায়ণৰ বাবে নিৰ্ব্বাচিত কৰি লৈছে জিলা খনৰ মৰনৈ আৰু দহিকতা অঞ্চল৷ সম্প্ৰতি আন ভিন্ন অঞ্চলৰ লগতে মৰনৈ আৰু দহিকটাত বৃদ্ধি পাইছে হাতী-মানুহৰ সংঘাত ৷

কেন্দ্ৰীয় খাদী গ্ৰামোদ্যোগ আয়গে ইতিমধ্যেই এই দুয়োটা অঞ্চলত স্থাপন কৰাৰ বাবে মৰনৈ আৰু দহিকটাৰ হাতী অহা-যোৱা কৰা বাটত সংস্থাপন কৰিব প্ৰায় তিনি শতাধিক মৌ বাঁহ৷ ইতিমধ্যে হাতী আহিব পৰা স্থান সমূহত এই মৌ সমূহ ৰখা হৈছে৷ মৌৰ গুণ গুণ শব্দ বনৰীয়া হাতীৰ প্ৰধান শত্ৰু৷ মৌ মাখিৰ বাবে বনৰীয়া হাতীয়ে আগুৱাই যোৱাটো সম্ভৱ নহ’ব ৷ এই মৌ বাঁহ সমূহৰ সমান্তৰালভাৱে সংস্থাপন কৰা হৈছে কেইবাটাও CCTV কেমেৰা ৷ নিশা মৌ-মাখিয়ে কি দৰে হাতীক খেদিবলৈ সক্ষম হয় সকলোবোৰ দৃশ্য বা গতিবিধি নিৰিক্ষণ কৰা হ’ব এই CCTV ৰ জৰিয়তে ৷

কেন্দ্ৰীয় খাদী গ্ৰামোদ্যোগ আয়োগে গোৱালপাৰা বন বিভাগৰ সহযোগত পোন প্ৰথম বাৰৰ বাবে গোৱালপাৰা জিলাত ৰূপায়ণ কৰিছে এই অভিনৱ পদক্ষেপ৷ আচঁনিৰ শুভ উদ্বোধন কৰে কেন্দ্ৰীয় খাদী গ্ৰামোদ্যোগ আয়গোৰ অধ্যক্ষ বিনয় কুমাৰ সাক্সেনাই ৷ ইতিমধ্যেই আয়োগে মৰনৈ আৰু দহিকটা অঞ্চলৰ বাবে বিনামূলীয়াকৈ এই মৌৰ বাঁহ সমূহ যোগান ধৰিছে ৷ হাতীয়ে মৌ বাঁহ নষ্ট কৰিলে পুনৰায় আয়েগে যোগান ধৰিব ৷

ইফালে মৌ বাঁহ সমূহৰ পৰা লাভ কৰা মৌ ৰস গৃহস্থই ব্যৱসায় কৰাৰ সুবিধা লাভ কৰিব ৷ হাতীৰ অহা সম্ভৱনা থকা পথাৰৰ কাষৰ প্ৰতিটো গৃহস্থই লাভ কৰিব দহটাকৈ মৌৰ বাহ৷ হাতীৰ সংঘাতত জৰ্জ্জড়িত লোক সকলে কেন্দ্ৰীয় খাদী গ্ৰামোদ্যোগ আয়গোৰ এই আঁচনিৰ পৰা উপকৃত হোৱাৰ লগতে গোৱালপাৰাত হাতী-মানুহৰ সংঘাত প্ৰশমিত কৰাত কিছু সহায়ক হ'ব বুলি আশা কৰিছে ৷

এই “ৰি-হেব” আঁচনিৰ জৰিয়তে দক্ষিণ ভাৰতত যথেষ্ট সু-ফল পোৱা গৈছে বুলি জানিবলৈ দি ৰি-হেবৰ বিষয়াই কয় যে হাতীয়ে উপদ্ৰৱ চলোৱা ঠাইত মৌ বাঁহ স্থাপন কৰা ঠাইলৈ বনৰীয়া হাতী যোৱাটো প্ৰায় ৮০% কমিছে ৷ গোৱালপাৰা জিলাত এই আঁচনিখনে ভাল ফল দেখুৱালে সমগ্ৰ অসমতে এই মৌ-মাখিৰে হাতী-মানুহৰ সংঘাত ৰোধৰ স্থায়ী সমাধানৰ বাবে আগবাঢ়িব খাদী আৰু গ্ৰামোদ্যোগ আয়োগে ৷

Read all News in Assamese, Assam News Today, Entertainment News in Assamese, Business News in Assamese, Sports News in Assamese, Health News in Assamese, India News in Assamese

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।