বৰপেটাৰোডত কম্পিউটাৰসহ দুই চোৰক আটক, বিদ্যালয়ৰ পৰা চুৰি হৈছিল কম্পিউটাৰকেইটা

বৰপেটাৰোড আৰক্ষীয়ে বৃহস্পতিবাৰে নিশা অভিযান চলাই দুজন কম্পিউটাৰ চোৰক আটক কৰিবলৈ সক্ষম হয় ৷ আটক কৰা চোৰ দুজন হৈছে কয়াকুছিৰ বাবুল হুছেইন আৰু তামুলপুৰৰ ফাজিজুল খান ৷

বৰপেটাৰোড আৰক্ষী থানাৰ ভাৰপ্ৰাপ্ত বিষয়া অভিজিৎ বৰুৱাই জানিবলৈ দিয়া মতে, কেইদিনমান আগতে ভৱানীপুৰৰ ৰাজাঘাটৰ এখন চৰকাৰী স্কুলৰ পৰা কেইবাটাও কম্পিউটাৰ ছেট চুৰি হৈছিল ৷ বৰপেটাৰোড আৰক্ষীয়ে এক গোপন সূত্ৰৰ পম খেদি বৰপেটাৰোডলৈ কম্পিউটাৰকেইটা এখন বলেৰ’ গাড়ীৰে লৈ বিক্ৰী কৰিবলৈ আহোতে চোৰ দুজনক আটক কৰে ৷ লগতে চুৰি হোৱা চাৰিটা কম্পিউটাৰ ছেট জব্দ কৰিবলৈ সক্ষম হয় ৷ আৰক্ষীয়ে বলেৰ’ গাড়ী এখনো জব্দ কৰে ৷