ক্ষুদ্ৰ সঞ্চয়ৰ সুফল, হাফিজুৰে দেখুৱালে আদৰ্শ ! এটকীয়া, দুটকীয়া আৰু দহ টকীয়া মুদ্ৰা জমা কৰি কিনিলে স্কুটী ...

মনত অদম্য হেপাহ থাকিলে যিকোনো অসম্ভৱ কামকে যে সম্ভৱ কৰি তুলিব পাৰি তাৰ জ্বলন্ত উদাহৰণ দাঙি ধৰিছে বৰপেটাৰোডৰ সমীপৱৰ্তী গোৱৰ্ধনাৰ হাফিজুৰ আকন্দ নামৰ এজন লোকে ৷ লোকজনে এটকা দুটকাকৈ মুঠ ২২ হাজাৰ টকাৰ খুচুৰা পইচা (Coin) জমা কৰি ক্ৰয় কৰিলে এখন স্কুটী ৷

হাফিজুৰৰ সপোন আছিল এখনি দুচকীয়া বাহন লোৱাৰ কিন্তু একেলগে ইমান টকা যোগাৰ কৰিব নোৱাৰা হাফিজুৰে টকা সঞ্চয়ৰ বাবে এক অভিনৱ পন্থা বাচি লৈছিল ৷ এটকীয়া, দুটকীয়া আৰু দহ টকীয়া মুদ্ৰা জমা কৰি ২২ হাজাৰমান টকা সঞ্চয় কৰিছিল ৷ অৱশেষত ক্ষুদ্ৰ সঞ্চয়ৰ সুফল পালে দৰিদ্ৰ পৰিয়ালৰ লোক হাফিজুৰ আকন্দে ৷ বিগত এবছৰে এটকা দুটকা কৈ সঞ্চয় কৰা উক্ত টকাৰে হাফিজুৰে ডাউন পেমেন্ট দি এখন স্কুটী ক্ৰয় কৰে ৷ হাফিজুৰে সঞ্চয় কৰা খুচুৰা পইচাখিনিলৈ বৰপেটাৰোডৰ শ্ব’ৰুমলৈ আহিছিল এখন স্কুটী কিনিবলৈ ৷ হাফিজুৰে সঞ্চয় কৰা মুদ্ৰাবোৰ শ্ব’ৰুমৰ সকলো কৰ্মচাৰীয়ে ৩/৪ ঘন্টা সময় গন্তি কৰি অৱশেষত হাফিজুৰক প্ৰদান কৰিলে এখনি স্কুটী৷ ক্ষুদ্ৰ সঞ্চয় কৰি স্কুটী কিনিবলৈ পাই বহুত সুখী হৈছে হাফিজুৰে ৷