দিপাৱলীৰ আকাশ ৰঙীন কৰিবলৈ সাজু বৰপেটাৰ আতচবাজী শিল্পীসকল, প্ৰদূষণ নিয়ন্ত্ৰণ ব’ৰ্ডৰ নিৰ্দেশনাই পেলাইছে বিপাঙত

দিপাৱলীৰ আকাশ ৰঙীন কৰিবলৈ সাজু বৰপেটাৰ আতচবাজী শিল্পীসকল৷ যোৱা দুটা বছৰে কোভিড পৰিস্থিতিৰ বাবে ব্যাপক লোকচানৰ সন্মুখীন হৈ আহিছে আতচবাজী শিল্পৰ সৈতে জড়িত শিল্পীসকল৷ যোৱা বছৰ দিপাৱলীৰ বাবে বৃহৎ পৰিমাণৰ আতচবাজী প্ৰস্তুত কৰিছিল শিল্পীসকলে৷ কিন্তু শেষ মুহূৰ্তত প্ৰদূষণ নিয়ন্ত্ৰণ ব’ৰ্ডৰ নিষেধাজ্ঞাৰ বাবে দিপাৱলীৰ বাবে প্ৰস্তুত কৰা আতচবাজীসমূহ বিক্ৰীৰ অভাৱত পেলাই দিবলগীয়া হৈছিল৷

এইবাৰ মুখ্যমন্ত্ৰীয়ে দিপাৱলী অনুষ্ঠিত কৰাত বাধা নাই বুলি মন্তব্য কৰিছিল যদিও প্ৰদূষণ নিয়ন্ত্ৰণ ব’ৰ্ডৰ একেই বাধা ৷ মুখ্যমন্ত্ৰী ড০ হিমন্ত বিশ্ব শৰ্মাৰ ওপৰত ভৰসা কৰিয়ে ব্যৱসায় আৰম্ভ কৰিছে আতচবাজী শিল্পীসকলে৷ প্ৰদূষণ নিয়ন্ত্ৰণ ব’ৰ্ডে দিপাৱলীক লৈ বাৰে বাৰে জাৰি কৰা নিষেধাজ্ঞাক লৈ অসন্তুষ্টি প্ৰকাশ কৰিছে শিল্পী পৰিয়ালসমূহ৷

তাৰোপৰি চৰকাৰৰ আত্মনিৰ্ভৰশীল অসমৰ সপোন অসাৰ বুলিও মন্তব্য কৰিছে শিল্পী পৰিয়ালসমূহে৷ শতিকাপ্ৰাচীন বৰপেটাৰ আতচবাজী শিল্পটোৰ সৈতে জড়িত লোকসকলে চৰকাৰৰ সহায় পালেহে শিল্পটো জীয়াই ৰাখিবলৈ সক্ষম হ’ব বুলি মন্তব্য কৰে৷

ইপিনে গুৱাহাটীৰ বজাৰত আতচবাজী বিক্ৰীৰ বাবে এতিয়ালৈকে অনুজ্ঞা প্ৰদান কৰা নাই জিলা প্ৰশাসনে৷ ফলত গুৱাহাটীত বৰপেটাৰ আতচবাজী বিক্ৰী কৰিব পৰা নাই শিল্পীসকলে৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।