ডিব্ৰুগড়ৰ বিশিষ্ট লোকশিল্পী পদ্ম দাসক ২০২৩ বৰ্ষৰ বকুলবন বঁটা প্ৰদান ...

অসমৰ লোকশিল্পীসকলক বিশেষ ভাবে সন্মান জ্ঞাপন কৰি আহিছে বকুলবন ন্যাস , অসমে । ২০২৩ বৰ্ষৰ বকুলবন বটা আগবঢ়োৱা হৈছে অসমৰ লোকসংগীতৰ এক অনুপম উপাদান বনগীতৰ বিশিষ্ট সাধক , বিশিষ্ট লোকশিল্পী ডিব্ৰুগড়ৰ পদ্ম দাসলৈ ।

শুক্ৰবাৰে এক গাম্ভীৰ্যপূৰ্ণ অনুষ্ঠানত যোৰহাটত এই বঁটা শিল্পীগৰাকীক প্ৰদান কৰা হয় । বিগত ছটা দশক ধৰি বনগীতৰ চৰ্চা অব্যাহত ৰাখিছে অশিতীপৰ শিল্পী পদ্ম দাসে । বনগীতৰ বিশিষ্ট শিল্পীগৰাকীলৈ এই বঁটা আগবঢ়াবলৈ পাই ন্যাস ধন্য হৈছে বুলি জানিবলৈ দিছে বকুলবন ন্যাসে ।

১৯৩৯ চনত ডিব্ৰুগড়ত জন্ম লাভ কৰা পদ্ম দাসে আনুষ্ঠানিক শিক্ষা সমাপ্ত কৰিব নোৱাৰাৰ পিছত জীৱন নিৰ্বাহৰ বাবে এটা মটৰ গেৰেজ খুলিছিল । কিন্তু ইয়াৰ পিছতো তেওঁ নিজৰ শিল্পী সত্বাক জীয়াই ৰাখিছিল । সুৰীয়া কন্ঠেৰে গীত গোৱা পদ্ম দাসৰ বনগীতসমূহ ডিব্ৰুগড়ৰ বিভিন্ন অনুষ্ঠানৰ আকৰ্ষণ হৈ পৰিছিল । জীৱিকাৰ বাবে কৰি অহা কঠোৰ সংগ্ৰামৰ মাজতো ১৯৭৪ চনৰ পৰা আকাশবাণী ডিব্ৰুগড় কেন্দ্ৰত নিয়মীয়া শিল্পী হিচাবে বনগীত পৰিৱেশন কৰি আহিছিল পদ্ম দাসে । আনহাতে লোকশিল্পীগৰাকীয়ে বিভিন্ন লোকক বনগীতৰ শিক্ষা প্ৰদান কৰি বনগীতৰ সংৰক্ষণ আৰু সংবৰ্ধনৰ ক্ষেত্ৰতো বিশেষ ভূমিকা গ্ৰহণ কৰি আহিছে । তেখেতৰ ওচৰত  বনগীতৰ শিক্ষা লাভ কৰে বহু শিল্পীয়ে আকাশবাণীত গীত পৰিৱেশন কৰিছে ।

ভাৰতীয় গণনাট্য সংঘৰ নিষ্ঠাবান কৰ্মী লোকশিল্পী পদ্ম দাসক বকুলবনৰ কবি আনন্দচন্দ্ৰ বৰুৱাৰ জন্মদিনৰ দিনটোত ২৭ জানুৱাৰীত যোৰহাটত এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰা হয় । এই বঁটাত বঁটাৰ উপৰিও সম্বৰ্ধনা পত্ৰ , অংগবস্ত্ৰ আৰু নগদ ধনৰ মাননি আগবঢ়োৱা হয় ।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|