Facebook, WhatsApp নহয়, এইবাৰ Free Fireত প্ৰেম, তামুলপুৰৰ যুৱতী পালেগৈ কলকাতা, তাতেই লাগিল অথন্তৰ

প্ৰথমে মোবাইল গেমৰ জৰিয়তে চিনাকি৷ তাৰ পিছত প্ৰেম আৰু শেষত অপহৰণ৷ এতিয়া ৰঙাঘৰৰ আলহী প্ৰেমিক৷ এই ঘটনা সংঘটিত হৈছে বাক্সা জিলাৰ তামুলপুৰত৷ ঘটনাৰ বিৱৰণী মতে, মোবাইল গেমৰ জৰিয়তে চিনাকী হোৱা কলকাতাৰ এজন যুৱকে কৌশলেৰে প্ৰেমৰ জালত পেলাই অপহৰণ কৰিলে তামুলপুৰৰ এগৰাকী যুৱতীক৷

প্ৰথমে মোবাইলত গেম, পিছত চলাহী কথা৷ কথা–বতৰাৰ মাজতে আদান–প্ৰদান হ’ল ফোন নম্বৰ। যুৱকৰ চলাহী কথাত ভোল গ’ল যুৱতী। দুয়োৰে মাজত চলিল প্ৰেম। তাৰ পিছত প্ৰেমিকাক লগ পাব বিচাৰিলে প্ৰেমিকে। মাতি পঠিয়ালে কলকাতালৈ। অনলাইনত কাটি দিলে ৰে’লৰ টিকট।

প্ৰেমিকে কাটি দিয়া ৰে’লৰ টিকট হাতত লৈ ঘৰৰ পৰা অন্তৰ্ধান হ’ল যুৱতীগৰাকী। ৫ নৱেম্বৰত পৰিয়ালৰ লোকক নোকোৱাকৈ ঘৰ এৰি প্ৰেমিকাৰ ওচৰলৈ ঢাপলি মেলিলে যুৱতীগৰাকীয়ে। বহুত বিচাৰ খোচাৰ কৰিও পৰিয়ালৰ লোকে কোন সন্ধান নাপাই কাষ চাপিল তামুলপুৰ আৰক্ষীৰ৷ তৎপৰ হৈ পৰিল তামুলপুৰ আৰক্ষী৷ চলালে তীব্ৰ সন্ধান৷ আৰক্ষীৰ তদন্তত সন্ধান ওলাল যুৱতীগৰাকীৰ। ম’বাইল ট্ৰেক কৰি যুৱতীগৰাকীৰ লোকেশ্বন ধৰা পৰিল। লোকেশ্বন পশ্চিম বংগৰ ২৪ পৰগনা জিলাৰ তিতাগড় থানাৰ এখন অখ্যাত গাঁও৷

তামুলপুৰ আৰক্ষী থানাৰ অন্তৰ্গত গান্ধীবাৰী আৰক্ষী চকীৰ ভাৰপ্ৰাপ্ত বিষয়া বিজয় কুমাৰ দাসৰ নেতৃত্বত আৰক্ষীৰ এটা দলে বেংগল আৰক্ষীৰ সহযোগত উদ্ধাৰ কৰিলে যুৱকসহ তামুলপুৰৰ যুৱতীগৰাকীক৷ আটক হল শ্বেখ ৰছিদ আমিন নামৰ ২৩ বছৰীয়া যুৱকজন। আৰু মঙলবাৰে নিশা অপহৃত যুৱতী আৰু অপহৰণকাৰী যুৱকক লৈ আৰক্ষীৰ দল হাজিৰ তামুলপুৰ আৰক্ষী থানাত। যুৱকজন এটা দুষ্ট চক্ৰৰ সদস্য বুলি সন্দেহ আৰক্ষীৰ। বৰ্তমান আৰক্ষীৰ তদন্ত অব্যাহত আছে।