অভিশপ্ত বাঘজান তৈলখাদৰ জুইয়ে প্ৰাণ কাঢ়িলে আৰু এজনৰ, কৰ্তব্য পালনৰ সময়ত মৃত্যু ২৫ বছৰীয়া অভিযন্তা অৰ্ণৱ কিশোৰ বৰদলৈৰ

বাঘজানৰ অভিশপ্ত তৈলখাদৰ জুইয়ে কাঢ়িলে আৰু এজনৰ প্ৰাণ। অইলৰ জ্যেষ্ঠ ইলেকট্ৰিকেল ইঞ্জিনীয়াৰ অৰ্ণৱ কিশোৰ বৰদলৈ আবেলি জেনেৰেটৰৰ কেবল মেৰামতি কৰি থকাৰ সময়তে হঠাৎ অচেতন হৈ পৰে আৰু ততাতৈয়াকৈ তেওঁক চিকিৎসা প্ৰদান কৰি ডিব্ৰুগড়ৰ অসম চিকিৎসা মহাবিদ্যালয় আৰু হাস্পতাললৈ নিয়া হয় যদিও তাতে তেওঁক মৃত ঘোষণা কৰা হয়। ২৫ বছৰীয়া জ্যেষ্ঠ অভিযন্তাজনক প্ৰথমে তিনিচুকীয়া অসামৰিক চিকিৎসালয়ত অনা হৈছিল আৰু পৰৱৰ্তী সময়ত AMCH লৈ যোৱা হয় যদিও মাজ পথতে মৃত্যুক আঁকোৱালি লয়।

তৈল কোম্পানীটোৱে তৈলখাদৰ জুই নুমুৱাৰ বৃথা প্ৰয়াস অব্যাহত ৰখাৰ সময়তে কম বয়সীয়া অভিযন্তাজনৰ মৃত্যুৱে শোকৰ ছাঁ পেলাইছে। অইলৰ বিবৃতি অনুসৰি মৃত্যুৰ প্ৰকৃত কাৰণ মৰণোত্তৰ পৰীক্ষাৰ পিছতহে নিৰ্ধাৰণ হ’ব।



উল্লেখ্য যে, যোৱা ৭ ছেপ্তেম্বৰত অইলে তৈল খাদৰ জুই নুমুৱাৰ দাবী কৰাৰ আঠ ঘণ্টাৰ পিছতে আকৌ খাদৰ পৰা লিকেজৰ কাৰণে পুনৰ জুই ওলাবলৈ ধৰে।

ইতিমধ্যে অসম চৰকাৰে ‘কিল দ্য ৱেল’ সিদ্ধান্ত লৈ কেনাডাৰ বিশেষজ্ঞৰ সহায় বিচাৰিছে আৰু সেইমতে বাঘজানৰ জুই আগন্তুক দুমাহলৈ নুমুৱাৰ সম্ভাৱনা নাই। অইল ইণ্ডিয়াৰ ইতিমধ্যে প্ৰতিটো প্ৰয়াস ব্যৰ্থ হৈছে।

জুন মাহত অগ্নিকাণ্ডৰ পিছতে অইলৰ দুজন কৰ্মচাৰীৰ মৃত্যু হৈছিল। নিহত দুজন আছিল প্ৰাক্তন ফুটবলাৰ দুৰ্লভ গগৈ আৰু তিখেশ্বৰ গোঁহাই।