AIUDF Vs Assam Congress : কংগ্ৰেছৰ তালিকাক অবৈধ আখ্যা দি বদৰুদ্দিন আজমলে ৰকিবুলক ক'লে সৰু ভাই বুলি

কংগ্ৰেছে UPAৰ পৰা AIUDFক খেদি পঠিওৱাৰ পিছতে প্ৰদেশ কংগ্ৰেছে প্ৰস্তুত কৰা এখন তালিকাক লৈ এতিয়া সৰৱ বদৰুদ্দিন আজমলৰ এআইইউডিএফ (AIUDF)৷ ইয়াৰ মাজতে ৰকিবুল হুছেইনে ধুবুৰীৰ পৰা লোকসভাত প্ৰতিদ্বন্দ্বিতা কৰিবলৈ সাজু বুলি কোৱাৰ পিছত এতিয়া ভীষণ ক্ষুণ্ণ AIUDF৷

প্ৰদেশ কংগ্ৰেছে প্ৰস্তুত কৰিছিল এখন তালিকা ৷ ২০২৪ৰ লোকসভাৰ নিৰ্বাচনৰ বাবে ১৪ সমষ্টিত প্ৰতিদ্বন্দ্বিতা কৰিব বিচৰা প্ৰাৰ্থীৰ নাম সন্নিৱিষ্ট কৰা হৈছিল তালিকাখনত ৷ তালিকাখন ভুৱা নে সঁচা? তাক লৈ ব্যাপক চৰ্চা চলিল ৷ কাৰ্যকৰী সভাপতি জাকিৰ হুছেইন শিকদাৰে নিজে তালিকাখনৰ বিষয়ত একো নাজানো বুলি ক’লে ৷ ইয়াৰ পিছত এই বিষয়ত শুকুৰবাৰে AIUDF প্ৰধান সাংসদ বদৰুদ্দিন আজমলে কংগ্ৰেছৰ তালিকাক ভুৱা আখ্যা দিলে ৷

কংগ্ৰেছৰ তালিকাক লৈ AIUDFৰ জ্যেষ্ঠ বিধায়ক ড° ৰফিকুল ইছলামেও পুনৰ সৰৱ হৈ উঠিল ৷ ৰফিকুলৰ দাবী— “ভূপেন বৰাই বন্ধ কোঠাত বহি ব্যায়াম কৰি তালিকা বনাইছে ৷ তালিকাৰ কথা কাৰ্যকৰী সভাপতি, বিৰোধী দলপতিয়েও নাজানে ৷”

বহি নাথাকিল কংগ্ৰেছৰ নিলম্বিত বিধায়ক শ্বেৰমান আলী আহমেদো ৷ শ্বেৰমানে ক’লে— “কংগ্ৰেছে তালিকা প্ৰকাশ কৰি থাকিব আৰু নিৰ্বাচনত শূন্য হৈ থাকিব ৷”

কংগ্ৰেছৰ তালিকাৰ পিছত এইবাৰ ৰকিবুল হুছেইনৰ বিষয়ত সৰৱ হৈ উঠিল AIUDFৰ নেতৃত্ব ৷ কিয়নো বদৰুদ্দিন আজমলৰ বিৰুদ্ধে ধুবুৰীত প্ৰতিদ্বন্দ্বিতা কৰিবলৈ ৰকিবুল হুছেইন সাজু বুলি খোদ ৰকিবুলে সদৰী কৰিছে ৷ এই বিষয়ত শুকুৰবাৰে বদৰুদ্দিন আজমলে ক’লে— “ৰকিবুল হুছেইন মোৰ ভাই ৷ পৰিয়ালৰ মানুহ বাবে আমি দৰ্জা বন্ধ কৰি কথা পাতিম ৰকিবুলৰ সৈতে ৷”

ৰকিবুলৰ ধুবুৰী যাত্ৰাক লৈ সৰৱ হৈ উঠিল ৰফিকুল ইছলামো ৷ ৰফিকুলৰ দাবী— “আজমলৰ বিৰুদ্ধে ধুবুৰীত কোনেও প্ৰতিদ্বন্দ্বিতা কৰি লাভ নাই ৷ ধুবুৰীত আজমল ১১০% জয়ী হ’ব ৷”

ইপিনে ৰকিবুলৰ বিৰুদ্ধে গৰজি উঠিল কংগ্ৰেছৰ নিলম্বিত বিধায়ক শ্বেৰমানো ৷ শ্বেৰমানে ক’লে- “ৰকিবুলৰ লাজ-চৰম নাই ৷ ৱাকফ সম্পত্তি দখল কৰি ৰাখিছে ৰকিবুলে৷ ইমান বছৰ মন্ত্ৰী হৈ থাকি কি কৰিছিল মুছলমানৰ বাবে ৰকিবুল হুছেইনে ৷ মুছলমানৰ বাবে মাত মাতিছিল নে? এনেই সংখ্যালঘুৰ ডাঙৰ নেতা বুলি কোৱা ৰকিবুলক এইবাৰ সংখ্যালঘু অঞ্চলত গ’লেই খেদিব ৷”