Assam's Kaji Lemon Viral in London : ভাল খবৰ! লণ্ডনৰ বজাৰত অসমৰ কাজি নেমু, টুইটাৰত তুমুল চৰ্চা, ফটো ভাইৰেল।

অসমীয়া খাদ্য সম্ভাৰত এক বিশেষ স্থান আছে কাজি নেমুৰ । কেৱল অসমতে উৎপন্ন হোৱা কাজি নেমু এতিয়া সহজ লভ্য ইংলেণ্ডৰ ৰাজধানী চহৰ লণ্ডনত । টুইটাৰত ইতিমধ্যে এই সন্দৰ্ভত চলিছে ব্যাপক চৰ্চা; লণ্ডন বজাৰত স্থান লাভ কৰা অসমৰ নেমুৰ ফটো ভাইৰেল হৈছে ।

জানিব পৰা মতে যোৱা মাহত প্ৰায় ১২০০কিলোগ্ৰাম কাজি নেমু গোপীনাথ বৰদলৈ আন্তৰ্জাতিক বিমানবন্দৰৰ পৰা লণ্ডনলৈ অত্যাধুনিক প্ৰযুক্তি ব্যৱহাৰ কৰি ৰপ্তানি কৰা হৈছিল । এতিয়া সেই নেমুবোৰ লণ্ডনৰ বিভিন্ন ছুপাৰ মাৰ্কেট পাইছেগৈ । ইংলেণ্ডৰ East Midlands অঞ্চলৰ Northamptonৰ Al-Hamra ছুপাৰ মাৰ্কেটত অসমৰ নেমুৱে চাহিদা লাভ কৰিছে বুলি বেপাৰী সকলে জানিবলৈ দিছে ।

উল্লেখযোগ্য যে, এই নেমু সমূহ সংগ্ৰহ কৰা হৈছিল চিৰাং জিলাৰ পানবাৰী বড’ফা FPCৰ পৰা । অসম চৰকাৰৰ প্রকল্প Assam Agribusiness and Rural Projectৰ অধীনত নেমু সমূহ ৰপ্তানি কৰা হৈছিল । ভাৰত চৰকাৰৰ বাণিজ্য মন্ত্ৰণালয়ৰ প্ৰতিষ্ঠান Agricultural and Processed Food Products Export Development Authority চমুকৈ APEDAই টুইটাৰত অসমৰ কাজি নেমু লণ্ডনলৈ প্ৰেৰণ কৰাৰ কথা ২জুন তাৰিখে ঘোষণা কৰিছিল । ২০২০চনৰ ৪ ডিচেম্বৰ আৰু ২০২১চনৰ ২৮ জানুৱাৰীতো ৬মেট্ৰিক টন নেমু ইউৰোপ মহাদেশৰ বিভিন্ন বজাৰলৈ প্ৰেৰণ কৰা হৈছিল । এই নেমুসমূহ মূলতঃ তিনিচুকীয়াৰ গ্রামঞ্চলৰ বাগানৰ পৰা সংগ্ৰহ কৰা হৈছিল । পূৰ্বেও অসমৰ পৰা ৰঙালাও, লেতেকু, আনাৰস আদি ডুবাইলৈ পঠিওৱা হৈছে ।

কাজি নেমুত পৰ্যাপ্ত পৰিমাণৰ ভিটামিন চি থাকে যি শৰীৰৰ ৰোগ প্ৰতিৰোধ ক্ষমতা বৃদ্ধি কৰাত সহায়ক হয় । অসমীয়া মানুহে ভাতৰ লগত নেমুৰ জুতি লোৱাৰ লগতে নেমু পানীয়, আচাৰ আদি প্ৰস্তুত কৰোঁতেও ব্যৱহাৰ হয় । ২০১৯চনত কাজি নেমুৱে ভৌগোলিক পৰিসীমা অসম বুলি GI tag লাভ কৰিছে ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।