Assam Boat Accident: নৈপৰীয়াৰ ভোট লৈ এতিয়া সাগৰীয় বতাহ খাই আছে সোণোৱালেঃ ভূপেন বৰা
বিভাগীয় মন্ত্ৰী পাটোৱাৰীয়ে পদত্যাগ কৰাৰ দাবীৰে মুখ্যমন্ত্ৰীকো সমালোচনা অসম প্ৰদেশ কংগ্ৰেছৰ।
বিভাগীয় মন্ত্ৰী পাটোৱাৰীয়ে পদত্যাগ কৰাৰ দাবীৰে মুখ্যমন্ত্ৰীকো সমালোচনা অসম প্ৰদেশ কংগ্ৰেছৰ।
- News18 Assam
- Last Updated :
নিমাতীঘাটত বুধবাৰে সংঘটিত ভয়ংকৰ নাও দুৰ্ঘটনাক লৈ বৃহস্পতিবাৰে ৰাজ্য আৰু কেন্দ্ৰীয় চৰকাৰক সমালোচনাৰে থকা-সৰকা কৰিলে প্ৰদেশ কংগ্ৰেছে ৷ আভ্যন্তৰীণ জল পৰিবহণ মন্ত্ৰীৰ পদত্যাগৰ পৰা আৰম্ভ কৰি প্ৰধানমন্ত্ৰীয়ে দিয়া প্ৰতিশ্ৰুতি, প্ৰাক্তন মুখ্যমন্ত্ৰী তথা এতিয়াৰ কেন্দ্ৰীয় মন্ত্ৰী সৰ্বানন্দ সোণোৱালক জবাবদিহি কৰে প্ৰদেশ কংগ্ৰেছৰ সভাপতি ভূপেন বৰাই ৷
২০১৬ৰ ২৩ মাৰ্চ , স্থান মাজুলী ৷ নিৰ্বাচনী প্ৰচাৰ সভাত অংশগ্ৰহণ কৰি প্ৰধানমন্ত্ৰী নৰেন্দ্ৰ মোদীয়ে মাজুলীত ৭০ বছৰে দলং নিৰ্মাণ নোহোৱা কাম তেওঁৰ চৰকাৰে পাঁচ বছৰতে কৰিব বুলি ঘোষণা কৰিছিল ৷
নিৰ্বাচনী সভাত এনেদৰেই যোৰহাট-মাজুলী সংযোগী দলং পাঁচ বছৰত নিৰ্মাণৰ প্ৰতিশ্ৰুতি দিছিল প্ৰধানমন্ত্ৰী নৰেন্দ্ৰ মোদীয়ে ৷ প্ৰধানমন্ত্ৰী মোদীৰ সেই প্ৰতিশ্ৰুতিৰ ছয় বছৰৰ পিছত বুধবাৰে নিমাতীঘাটত সংঘটিত হ'ল ভয়ংকৰ নাও দুৰ্ঘটনা ৷ তাৰ পিছত বৃহস্পতিবাৰে ৰাজীৱ ভৱনত প্ৰদেশ কংগ্ৰেছে চৰকাৰক সমালোচনা কৰি প্ৰধানমন্ত্ৰী মোদীৰ নিৰ্বাচনী প্ৰতিশ্ৰুতিক সোঁৱৰাই দিলে ৷
প্ৰধানমন্ত্ৰী মোদীক সমালোচনা কৰাৰ লগতে প্ৰাক্তন মুখ্যমন্ত্ৰী তথা বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালক কটাক্ষ কৰি প্ৰদেশ কংগ্ৰেছৰ সভাপতি ভূপেন বৰাই ক'লে- “নৈপৰীয়া বতাহ খাই এতিয়া সাগৰৰ বতাহ খাই আছে সোণোৱালে ৷ মাজুলীৰ মানুহৰ মূৰত দলং সাজি মুখ্যমন্ত্ৰী হোৱা সোণোৱাল এতিয়া কেন্দ্ৰীয় মন্ত্ৰী ৷ কিন্তু মাজুলীত দলং নহ'লগৈ ৷ দুবাৰকৈ কিন্তু দলঙৰ আধাৰশিলা পাতিলে ৷”
আনহাতে, নিমাতীঘাটৰ নাও দুৰ্ঘটনাৰ পূৰ্বেও আভ্যন্তৰীণ জল পৰিবহণৰ বিষয়া বিক্ৰমাদিত্য চৌধুৰী ২০১৮ত নিলম্বিত হৈছিল ৷ এইবাৰো হৈছে ৷ কিন্তু একে দপ্তৰৰে মন্ত্ৰী চন্দ্ৰমোহন পাটোৱাৰীয়ে কিন্তু দায়িত্ব স্বীকাৰ কৰি পদত্যাগ কৰা নাই । প্ৰদেশ কংগ্ৰেছৰ দাবী- “দৃষ্টান্ত ৰাখি পদত্যাগ কৰক মন্ত্ৰী পাটোৱাৰীয়ে ৷”
ৰাজীৱ ভৱনত সংবাদমেল পাতি BJPৰ কেন্দ্ৰ আৰু ৰাজ্য চৰকাৰক সমালোচনাৰে থকা-সৰকা কৰা প্ৰদেশ কংগ্ৰেছৰ সভাপতি ভূপেন বৰাই মুখ্যমন্ত্ৰী ড° হিমন্ত বিশ্ব শৰ্মাকো ৰেহাই নিদিলে ৷ ভূপেন বৰাই ক'লে- “মুখ্যমন্ত্ৰীৰ এশদিনীয়া কাৰ্যকালত মৃত্যুয়ে কিৰীলি পাৰিছে ৷ মিজোৰাম সীমান্তত ছয় আৰক্ষী জোৱানে প্ৰাণ দিলে, SP চিৰজীৱনৰ বাবে ঘুণীয়া হ'ল ৷ ডিমা হাছাওত পাঁচজনে প্ৰাণ দিলে, ধেমাজিত ছাত্ৰীক ঘপিয়াই হত্যা কৰিলে ৷ এতিয়া নিমাতীত পৰীমিতা দাসে প্ৰাণ দিবলগীয়া হ'ল ৷ ইয়াৰ পিছত মুখ্যমন্ত্ৰীয়ে বিধায়ক কিনা বাদ দি ৰাইজৰ কামত লাগক ৷”
আভ্যন্তৰীণ জল পৰিবহণ বিভাগক সমালোচনা কৰি ভূপেন বৰাই বিভাগটোৰ নাম সলনি কৰি পি-পু-সি-শু কৰিবলৈও পৰামৰ্শ দিয়ে ৷
অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|
