দিল্লীত বাহৰ পাতিছে অসম আৰক্ষীৰ দলে, কিয় এতিয়াও জিম্মাত পোৱা নাই শ্বাৰ্জিল ইমামক?

এতিয়াই অসমলৈ অনা নহয় শ্বাৰ্জিল ইমামক৷ এতিয়াও শ্বাৰ্জিলক অসমলৈ অনাৰ বাবে বাকী আছে আইনী মেৰপেঁচ। কামৰূপ মহানগৰ CJM আদালতৰ পৰা প্ৰডাকচন ৱাৰেন্ট লৈ জিম্মা বিচাৰি তিহাৰ কাৰাগাৰ কৰ্তৃপক্ষক ওচৰ চাপিছিল অসম আৰক্ষী৷ ১৩ ফেব্ৰুৱাৰীৰ ভিতৰত গুৱাহাটী হাজিৰ কৰাৰ নিৰ্দেশ দিছিল যদিও সেইটো যে হৈ উঠিব তাক লৈ সৃষ্টি হৈছে প্ৰশ্নবোধকৰ।

নাগৰিকত্ব সংশোধনী বিধেয়কৰ বিৰুদ্ধে নতুন দিল্লীৰ শ্বাহিনবাগত JNUৰ প্ৰাক্তন ছাত্ৰ শ্বাৰ্জিল ইমামে অসম আৰু উত্তৰ–পূবক লৈ কৰিছিল আপত্তিজনক মন্তব্য৷ ভাষণত অসম আৰু উত্তৰ–পূবক ভাৰতৰ পৰা আঁতৰাই ৰাখিব লাগে বুলি মন্তব্য কৰিছিল শ্বাৰ্জিলে৷ শ্বাৰ্জিলৰ মন্তব্যৰ পিছতে সমগ্ৰ দেশত সৃষ্টি হৈছিল ব্যাপক প্ৰতিক্ৰিয়াৰ। ৰুজু হৈছিল দেশদ্ৰোহৰ গোচৰ৷

শ্বাৰ্জিলৰ আপত্তিজনক ভাষণৰ ভিত্তিত মহানগৰ আৰক্ষীৰ ক্ৰাইম ব্ৰাঞ্চে দেশদ্ৰোহ, UAP আইনৰ ভিত্তিত ৰুজু কৰিছিল গোচৰ৷ এই গোচৰ সংক্ৰান্ততে ক্ৰাইম ব্ৰাঞ্চৰ ADCP নৱনাথ মহন্তৰ নেতৃত্বত নতুন দিল্লীত বাহৰ পাতি আছে আৰক্ষীৰ এটা দল৷

মহানগৰ আৰক্ষীৰ যুটীয়া আয়ুক্ত দেৱৰাজ উপাধ্যায়ে কয় – ‘‘শ্বাৰ্জিল ইমামক গুৱাহাটীলৈ আনি সোধা–পোছা কৰাৰ বাবে যিখিনি আইনগতভাৱে কৰিবলগীয়া আছে সেইখিনি কৰা হৈছে৷ তিহাৰ কাৰাগাৰলৈ ইতিমধ্যে লৈ যোৱা হৈছে প্ৰডাকচন ৱাৰেন্ট৷ কিন্তু নতুন দিল্লী আৰু উত্তৰ প্ৰদেশত কেইবাটাও গোচৰ চলি থকাৰ কাৰণে কেতিয়া শ্বাৰ্জিলক জিম্মাত পাম সেইটো এতিয়া কোৱাটো কঠিন হৈ পৰিছে৷’’

আনহাতে, শ্বাৰ্জিল ইমামক জিম্মাত বিচাৰি দেশৰ কেইবাখনো ৰাজ্যৰ আৰক্ষীয়ে নতুন দিল্লীত বাহৰ পাতি আছে৷ দিল্লী আৰক্ষীৰ গোচৰত বিহাৰৰ জাহানাবাদৰ পৰা গ্ৰেপ্তাৰ কৰিছিল শ্বাৰ্জিলক৷ ১৬ জানুৱাৰীত আপত্তিজনক ভাষণৰ পিছতে পলাতক অৱস্থাত আছিল শ্বাৰ্জিল।  দিল্লী আৰক্ষীয়ে এতিয়াও গোচৰৰ তদন্ত কৰি থকাৰ বাবে শ্বাৰ্জিলক অসমলৈ অনাত আহি পৰিছে আইনী বাধা৷ ইতিমধ্যে ১০ দিনতকৈ অধিক দিন মহানগৰ আৰক্ষীৰ দলটো নতুন দিল্লীতে বাহৰ পাতি আছে৷ আইনী বাধা আঁতৰিলেই অসমলৈ লৈ অনা হ’ব অসমক ভাগ কৰিব বিচৰা শ্বাৰ্জিলক ইমামক৷