BTADত গুপ্ত অস্ত্ৰভাণ্ডাৰ! এটা পষেকত উদ্ধাৰ দহটা অত্যাধুনিক মাৰণাস্ত্ৰ, বৃহৎ পৰিমাণৰ গুলী

সন্দেহজনক স্থানত অভিযান চলালেই এতিয়া উদ্ধাৰ হয় অত্যাধুনিক মাৰণাস্ত্ৰ ৷ কি AK47, কি AK56, কি HK-33 ৰাইফল? BTADৰ অধীনস্থ কেতবোৰ স্থানৰ পৰা সেনা আৰু আৰক্ষীয়ে অভিযান চলাই উদ্ধাৰ কৰি আছে M16, M20 চিৰিজৰ ৰাইফলচো ৷ লগতে 9MM পিষ্টলতো আছেই ৷

পিছে BTADত কোনে লুকুৱাই ৰাখিছে এই সমূহ অত্যাধুনিক মাৰণাস্ত্ৰ? এই মূহূৰ্তত BTADত কোনো বিদ্ৰোহী সংগঠন নাই ৷ কিয়নো বড়োভূমিত থকা NDFBৰ চাৰিওটা গোটেই ভাৰত চৰকাৰৰ সৈতে যোৱা ২৭ জানুৱাৰীত চুক্তিত স্বাক্ষৰ কৰি ইতিমধ্যে অস্ত্ৰ সম্বৰণ কৰিছে ৷

অস্ত্ৰ সম্বৰণৰ সময়ত কম সংখ্যক মাৰণাস্ত্ৰ জমা দিয়াৰ বিষয়টোয়ে চৰ্চা লাভ কৰিছিল ৷ চৰ্চা হৈছিল- ইমান কম সংখ্যক মাৰণাস্ত্ৰ লৈয়ে সশস্ত্ৰ সংগ্ৰাম চলাইছিলনে চাৰিটাকৈ NDFBৰ গোটে?

কিন্তু অস্ত্ৰ সম্বৰণৰ পিছত এতিয়া সেনা-আৰক্ষীয়ে গোপন তথ্যৰ ভিত্তিত অভিযান চলালে এটাৰ পিছত এটাকৈ অত্যাধুনিক মাৰণাস্ত্ৰ উদ্ধাৰ হয় ৷ চলিত এটা পষেকত BTADত আৰক্ষীয়ে চলোৱা এনে অবৈধ মাৰণাস্ত্ৰ বিৰোধী অভিযানত উদ্ধাৰ হৈছে দহটাকৈ স্বয়ংক্ৰিয় ৰাইফল ৷

যোৱা ৫ জুলাইত ওদালগুৰি আৰক্ষীয়ে দুটা AK56 ৰাইফল, তিনিটা মেগজিনসহ গুলী, এটা M20 আৰু এটা এটা 9MM পিষ্টল, মেগজিনসহ গুলী দুটা সুকীয়া অভিযানত উদ্ধাৰ কৰিছিল ৷

শণিবাৰে কোকৰাঝাৰ আৰক্ষীয়ে টিপকাই আৰক্ষী চকীৰ অধীনস্থ অঞ্চলত অভিযান চলাই উদ্ধাৰ কৰে এটা AK47 ৰাইফল ৷ একেদিনাই বাক্সা আৰক্ষীয়ে গোৰেশ্বৰ আৰক্ষী থানাৰ অধীনস্থ অঞ্চলত অভিযান চলাই উদ্ধাৰ কৰে দুটা AK47 ৰাইফল, দুটা 9MM পিষ্টল আৰু শিমলা আৰক্ষী থানাৰ অধীনত অভিযান চলাই উদ্ধাৰ কৰে এটা AK47 ৰাইফল ৷

কোকৰাঝাৰ আৰু বাক্সাত একে দিনাই চাৰিটাকৈ AK47 উদ্ধাৰ কৰাৰ এদিন পিছত অৰ্থাৎ দেওবাৰেও BTADত উদ্ধাৰ হ'ল অবৈধ মাৰণাস্ত্ৰ ৷ দেওবাৰে ওদালগুৰি আৰক্ষীয়ে হৰিশিঙাৰ লক্ষ্মী নদীৰ পাৰৰ পৰা এটা HK-33,এটা M16, এটা AK47 আৰু বহু সংখ্যাক গুলী উদ্ধাৰ কৰে ৷ দেওবাৰৰ দিনটোত চিৰাং আৰক্ষীও বহি নাথাকিল ৷ বিজনী আৰক্ষী থানাৰ অধীনত অভিযান চলাই উদ্ধাৰ কৰে গুলীসহ এটা HK-33 ৰাইফল ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।