» অসম

এক আজৱ ঘটনা সংঘটিত হৈছে এইখন অসমত। নৰহত্যাৰ অপৰাধত আৰক্ষীয়ে গ্ৰেপ্তাৰ কৰিলে পোৱালিসহ এজনী পোহনীয়া হাতী ৷ ৮ মহীয়া পোৱালিসহ আৰক্ষীয়ে গ্ৰেপ্তাৰ কৰিলে দুলুমণি নামৰ এজনী হাতীক ৷ বোকাখাত আৰক্ষীয়ে দুলুমণিক গ্ৰেপ্তাৰ কৰি চমজাই দিলে বন বিভাগক ৷ কিন্তু কোন এই দুলুমণি? দুলুমণিৰ অপৰাধ কি?

মুখ্যমন্ত্ৰী ডঃ হিমন্ত বিশ্ব শৰ্মাৰ নিৰ্দেশৰ পাছতেই শূন্য সহনশীল নীতিৰে অসম আৰক্ষীয়ে তৎপৰতাৰে অপৰাধীক আটক কৰিছে ৷ বহু সময়ত অপৰাধী গুলীবিদ্ধও হৈছে, কেইবাজনো মৰিছে। কিন্তু বোকাখাত আৰক্ষীয়ে অপৰাধীৰ সমান্তৰালভাৱে হাতীও গ্ৰেপ্তাৰ কৰিব লগা হৈছে ৷ অপৰাধী মানুহৰ বিপৰীতে বোকাখাত আৰক্ষীয়ে গ্ৰেপ্তাৰ কৰিলে সন্তানসহ দুলুমণি নামৰ এজনী হাতী ৷ হাতীজনীৰ অপৰাধ নৰহত্যা৷

এজন কিশোৰক হাতীজনীয়ে দাঁতেৰে খুঁচি হত্যা কৰাৰ বাবেই আৰক্ষীয়ে গ্ৰেপ্তাৰ কৰিলে দুলুমণিক। বোকাখাত ন্যায়িক দণ্ডাধীশৰ নিৰ্দেশ ক্ৰমে পাছত দুলুমণিক বন বিভাগৰ জিম্মালৈ প্ৰেৰণ কৰিছে ৷ হাতীজনীৰ গৰাকী এসময়ৰ কাজিৰঙাৰ ৰজাৰূপে খ্যাত বোকাখাতৰ প্ৰাক্তন বিধায়ক জিতেন গগৈ ৷

যোৱা ৮ জুলাইত দুলুমণিয়ে নৰহত্যাৰ এক ঘটনা সংঘটিত কৰিছিল ৷ বোকাখাতৰ নাহৰজান বাগিছাৰ সমীপৰ বিজুলী অঞ্চলত জিতেন গগৈৰ এই হাতীজনীয়ে বিতু গড় নামৰ এটা ১৪ বছৰীয়া কিশোৰক হত্যা কৰিছিল ৷ পৰিস্থিতি উত্তপ্ত কৰি শ্ৰমিকে জীতেন গগৈৰ বাসগৃহ ঘেৰাও কৰে ৷ বোকাখাতৰ মহকুমাধিপতি বিপুল দাস উপস্থিত হৈ পৰিস্থিতি নিয়ন্ত্ৰণ কৰে আৰু ৰাইজক সঠিক তদন্তৰ আশ্বাস দিছিল ৷ সেই অনুসৰি বোকাখাত আৰক্ষীয়ে গোচৰ নং 181/21 আৰু ভাৰতীয় দণ্ডবিধি আইনৰ 304 (A) ধাৰাত আদালতৰ নথিপত্ৰ প্ৰস্তুত কৰি বুধবাৰে বিয়লি দুলুমণি নামৰ হাতীজনীক আটক কৰি বোকাখাত থানালৈ আনে ৷ পৰৱৰ্তি সময়ত আদালতৰ নিৰ্দেশ মৰ্মে হাতীজনীক কাজিৰঙাৰ বন বিভাগৰ জিম্মাত দিয়ে ৷

এতিয়া গোচৰ নিস্পত্তি নোহোৱা পৰ্যন্ত দুলুমণি নামৰ হাতীজনী পোৱালিসহ বন বিভাগৰ জিম্মাত থাকিব ৷ জীতেন গগৈৰ হাতী প্ৰীতি বহু পুৰণা ৷ ৮০ দশকতেই আলফা ত্যাগ কৰি সাধাৰণ জীৱন যাপনৰ বাবে ওলায় অহা জীতেন গগৈয়ে গোলাঘাট কাৰ্বি আংলং সীমান্তৰ বিজুলী গ্ৰাণ্টত জ্ঞানদীপ (এতিয়া গগৈ টি) নামেৰে বাগিছা প্ৰতিষ্ঠাৰ সময়তেই এজনী মাইকী হাতীৰ পোৱালি ধৰি প্ৰতিপালন কৰে ৷ সেই হাতী জনীৰ পৰাই এতিয়া জিতেন গগৈ ৫টা হাতীৰ গৰাকী হয় ৷ তাৰ মাজৰেই দুলুমণীয়ে সংঘটিত কৰিছে এই হত্যাকাণ্ড ৷