আধাৰকাৰ্ড নহয় নাগৰিকত্বৰ আধাৰ! আধাৰ বঞ্চিত ২৭ লাখ লোকৰ বাবে উচ্চতম ন্যায়ালয়ত শপতনামা দিব ৰাজ্য চৰকাৰে

ৰাষ্ট্ৰীয় নাগৰিক পঞ্জীৰ বাবে ৰাজ্যৰ বৃহৎ সংখ্যক লোক বঞ্চিত হৈ আছে আধাৰকাৰ্ডৰ পৰা ৷ আধাৰকাৰ্ড নথকা এনে লোকৰ সংখ্যা প্ৰায় ২৭লাখ ৷ এই ২৭লাখ আধাৰ বঞ্চিত লোকক আধাৰকাৰ্ড প্ৰদানৰ বাবে ৰাজ্য চৰকাৰে লৈছে বিশেষ পদক্ষেপ ৷ এই সমস্যা দূৰীকৰণৰ বাবে ৰাজ্যৰ বহুকেইটা সংগঠনৰ সৈতে এলানী আলোচনাত মিলিত হৈছে ৰাজ্য চৰকাৰ ৷

বৃহস্পতিবাৰেও খানাপাৰাস্থিত অসম প্ৰশাসনিক পদাধিকাৰী মহাবিদ্যালয়ত জনসংযোগ মন্ত্ৰী পীযুষ হাজৰিকা,মন্ত্ৰী অতুল বৰা, মন্ত্ৰী যোগেন মহনৰ উপস্থিতিত কেইবাটাও ছাত্ৰ সংগঠনৰে আলোচনাত মিলিত হৈ ৰাষ্ট্ৰীয় নাগৰিক পঞ্জী(NRC) আৰু আধাৰকাৰ্ড প্ৰদান সম্পৰ্কত আলোচনা কৰে ৷

এইখিনিতে উল্লেখ কৰিব পাৰি যে, ৰাজ্য চৰকাৰে বিসংগতিৰ বাবে এইপৰ্যন্ত গ্ৰহণ কৰা নাই ৰাষ্ট্ৰীয় নাগৰিক পঞ্জী ৷ উচ্চতম ন্যায়ালয়ৰ প্ৰত্যক্ষ হস্তক্ষেপত প্ৰস্তুত কৰা NRC ৰাজ্য চৰকাৰে গ্ৰহণ নকৰিলেও NRCৰ বাবে আধাৰ বঞ্চিত লোকসকলৰ বাবে শীঘ্ৰেই ৰাজ্য চৰকাৰে উচ্চতম ন্যায়ালয়ত আবেদন জনাব বুলি লোৱা সিদ্ধান্তত হয়ভৰ দিছে আলোচনাত উপস্থিত থকা সংগঠন সমূহৰ নেতৃত্বই ৷

"আধাৰকাৰ্ড নাগৰিকত্বৰ আধাৰ হ'ব নোৱাৰে ৷ ২৭ লাখ লোক আধাৰকাৰ্ডৰ পৰা বঞ্চিত হৈ আছে ৷ আসোৱাহপূৰ্ণ NRC বাতিল কৰি পুনৰীক্ষণৰ বাবে আমি SUPREME COURTত আবেদন কৰিম ৷ যদি পুনৰীক্ষণৰ পিছত আধাৰকাৰ্ড লাভ কৰা কোনো লোক বিদেশী বুলি চিহ্নিত হয় সেই সকলৰ আধাৰকাৰ্ড কৰ্তন কৰিবলৈও শপতনামাত আমি উল্লেখ কৰিম ৷", আলোচনাৰ পিছত এই মন্তব্য মন্ত্ৰী পীয়ুষ হাজৰিকাৰ ৷

বৈঠকত অংশ লোৱা অসম জাতীয়তাবাদী যুৱ ছাত্ৰ পৰিষদৰ (AJYCP) সাধাৰণ সম্পাদক পলাশ চাংমাইৰ দাবী, "সকলো খিলঞ্জীয়া লোকে পাব লাগিব আধাৰকাৰ্ড ৷ কোনো খিলঞ্জীয়া লোকক বঞ্চিত কৰি ৰাখিব নোৱাৰিব আধাৰকাৰ্ড লাভৰ পৰা ৷"অসম পাব্লিক ৱৰ্কছৰ (APW) সভাপতি অভিজিৎ শৰ্মাই NRC পুনৰীক্ষণৰ দাবীত APW সদায় অটল বুলি কোৱাৰ লগতে NRCত নাম নাহিলেও খিলঞ্জীয়া লোকে আধাৰ পাবই লাগিব বুলি সদৰি কৰে সংবাদ মাধ্যমত৷

এইখিনিতে মন কৰিব লগীয়া কথাটো হ'ল যে, NRCৰ প্ৰথমখন খচৰা প্ৰকাশ হওঁতেই নাগৰিক পঞ্জীত নাম নহা ৪০লাখ লোকৰ ২৭লাখ লোকে NRCৰ বাবে জনাইছিল আবেদন ৷ সেই ২৭লাখ লোকৰ আধাৰৰ বাবে সংগ্ৰহ কৰা হৈছিল বায়'মেট্ৰিকো ৷ কিন্তু পৰৱৰ্তী পৰ্যায়ত সম্পূৰ্ণ খচৰা প্ৰকাশৰ পিছতে সেই সকল লোকৰ ব্লক কৰা হ'ল বায়'মেট্ৰিক ৷